Pôa Y Bhăng Mlô, cheăm Ea Tul, tơring Čư̆ Mgar ai 1,5 ha kơphế dế tung pơla krí a kơpong mơ’nui dêi ƀuôn Sah Á, tơkoh ƀă cheăm Čư̆ Dliê M’Nông. Kố cho kơpong ki ôh tá ai mơngế, hngế ing tíu kuăn pơlê rêh ối, mâu hơnăm hdrối nah hmâ ai tơdroăng ki mâu ngế ki ‘mêi mot krí tong kơphế ki hiăng tum. Pôa Y Bhăng tối, ing mâu hơnăm hdrối mê hía nah, hơnăm kố mâu rơpŏng ki ai kơphế a kơpong kố hiăng tơrŭm ƀă kŏng an cheăm mơjiâng tíu gâk ukố umê vâ rak tơniăn kơdrum kơphế. Rêm hâi khu ki gâk kố pơrá lăm pơtrui ngăn, hbrâ kơchăng, rak ngăn kơphế a chiâk malối cho a kong măng. Xua mê, tơdroăng ki tong krí kơphế ki hiăng tum hdrối hiăng ôh tá ai xếo. Pôa Y Bhăng Mlô tối:

“Tíu gâk ngin ai 2 ngế kuăn pơlê tơrŭm ƀă khu kŏng an cheăm, hmâ a kơxê măng mê nhŏng o ngin lăm pơtrui ngăn a kơpong tíu ki tơkoh pơla cheăm Čư̆ Dliê M’Nông ƀă cheăm Ea Tul lăm pơtrui gâk sap ing kong xê măng troh 9 chôu kong măng mê vêh pơtê môi iâ ƀă a 11 chôu lơ 11 chôu 30 phut kong măng lăm pơtrui ngăn nếo ƀă troh a kơxo má 1chôu – 2 chôu nếo vêh. Mâu ngế ki tong hlo nhŏng o ngin gâk tơkâ luâ kong măng mê vâi xâu ôh ti khên mot tung chiâk tong krí kơphế xếo”.

Ea Tul cho cheăm ki ai ƀăng tơnêi pêt kơphế kân má môi tơring Čư̆ Mgar ƀă lối 2 rơpâu ha. Thiê̆u tă Đặng Trọng Minh - Ngế pơkuâ kŏng an cheăm tối, cheăm ai 10 to ƀuôn ƀă 1 to thôn. Mâu thôn, pơle nôkố pơrá hiăng châ krâ camera séa ngăn ƀă tơdroăng gâk kring tơniăn châ rak vế. Laga mâu hơnăm hdrối nah, cheăm xuân ối ai mâu rôh ki tong krí kơphế a chiâk, malối cho a mâu kơpong ki hngế ing kuăn pơlê ối. Hlo tơdroăng kố, kŏng an cheăm hiăng tí tăng ‘nâi plĕng ăm Đảng ủy cheăm mơjiâng mâu tíu gâk ukố umê tơkŭm lăm pơtrui ngăn vâ rak tơniăn kơphế ăm kuăn pơlê tung plâ rơnó krí. Thiê̆u tă Đặng Trọng Minh tối:

“Ngin mơjiâng sap ing 3 – 4 tíu gâk ukố umê, rêm tíu gâk sap ing 3 troh 5 ngế, bro a mâu kơpong ki hmâ pêt to kơphế, lơ bro a mâu tíu ki ai kuăn pơlê ôh tá hbrâ kơchăng, tơkéa vâ tối cho a mâu kơpong ki hmâ ai tơdroăng ki tong krí tơdrêng amê ai tơdrêng hlối khu séa ngăn. Hnoăng cheăng dêi kŏng an cho xiâm, ƀă ối ai mâu khu râ kơvâ cheăng khu râ a cheăm môi tiah: Teăng mâ khu lêng ƀă kuăn pơlê cheăm, Đoân Droh rơtăm, khu ngăn kuăn pơlê pêi chiâk, khu ngăn mố đô̆i hơnăm hiăng krâ, măt trâ̆n ƀă tá kuăn pơlê ki ai kơphế rơtế veăng gâk ngăn kơphế ăm vâi krâ nhŏng o”.

Rơnó krí 2023 – 2024, lâp kong pơlê Dak Lak ai vâ chê 213 rơpâu ha kơphế, ki dâi lĕm tiô riân châ sap ing 2,6 – 2,8 tâ̆n/ha, kloăng kơphế châ dâng 550 rơpâu tâ̆n, krí troh tơdế khế 1 hơnăm 2024. Tung pơla kố ai dâng 200 rơpâu ngế pêi cheăng a mâu kong pơlê ing peăng Kơnhŏng, peăng Tơdế tơnêi têa troh Dak Lak lăm krí kơphế. Xua kơxô̆ ngế krí hên, tơkŭm tung iâ khế, tơdroăng gâk kring ôh tá tơniăn.

Thươ̆ng tă Phan Thanh Cường – ngế xiâm pơkuâ Kŏng an kong pơlê Dak Lak ăm ‘nâi, pêi pro hnê mơhno dêi Kŏng an kong pơlê Dak Lak ‘na hbrâ mơdât mâu ngế ki pro xôi ‘na tŏng veăng kơphế rơnó krí hơnăm kố, ƀơrô cheăng hiăng tí tăng ‘nâi plĕng ăm kŏng an kong pơlê tơbleăng tơdâng tơ’mô mâu troăng hơlâ, môi tiah: Tơrŭm ƀă kŏng an mâu tơring, pơlê kong krâm, pơlê kong kơdrâm pơkuâ ngăn tro mâu ngế ki nhôm a mâu tơring, cheăm pôi tá ăm ai tơdroăng ki mâu ngế ki tong; pơkâ thế teăng mâ mâu tíu ki roê kế tơmeăm pêi lo ing chiâk deăng a kong pơlê pôi tá roê kơphế ối drêh, kơphế ôh ti ‘nâi xiâm kối xua ngế ki tong tê; hnê tối mơhnhôk kuăn pơlê mơdêk tơdroăng ki kơchăng, tơplâ mơdât, tối tơbleăng ăm khu ki ai hnoăng pơkuâ ‘na mâu ngế ki pro xôi vâ hbrâ mơdât sap ing hngế, tơrŭm ƀă mâu kơvâ cheăng tơkŭm po lăm pơtrui ngăn rak vế kế tơmeăm dêi Kuăn pơlê ƀă hên ki ê.

Thươ̆ng tă Phan Thanh Cường tối mâu hnoăng cheăng ki kal dêi tíu pêi cheăng tung tơdroăng tăng rup mâu ngế ki pro xôi tong krí kơphế rơnó 2023 – 2024.

“Ƀơrô kăn sat séa ngăn tơdroăng xôi hiăng hbrâ rơnáu mơjiâng túa pơkâ kô tơkŭm séa ngăn tâi tâng mâu ngế pêi cheăng sap ing kong pơlê ki ê troh pêi cheăng krí kơphế akố vâ pơkuâ ngăn, hbrâ mơdât sap ing hngế pôi tá ăm ai mâu ngế ki lâi pêi pro tơdroăng xôi ‘na luât, tong hơvĕng kế tơmeăm. Ing mê rak tơniăm gâk kring, vâ kuăn pơlê hmiân tuăn krí kơphế rơnó 2023 – 2024”.