VOV4.Xơ Đăng - Tơdroăng châ tơƀrê mơnhên ki tâk chu pro pơ’lêh hlá mơ-éa hơnăm 2021, kong pơlê Dak Lak châ 86,52 điêm, ối má 36/63 kong pơlê, pơlê kong kơdrâm ối tung Tơnêi têa, tâk 3,3 điêm, pro pơ’lêh 9 râ tâng pơchông ƀă hơnăm 2020. Ƀă ki tâk chu hâk môi tuăn dêi kuăn pơlê, khu tơrŭm cheăng ƀă tơdroăng veăng kum dêi kơ koan pơkuâ ‘na mơ-éa tơnêi têa hơnăm 2021 ối má 59/63 kong pơlê, pơlê kong kơdrâm, tâk 3 râ tâng pơchông ƀă hơnăm 2020.

Dak Lak rak tơniăn ki têk chu ivá tơbriât râ kong pơlê

Tiô pôa Nguyễn Đình Trung, Kăn cheăng tung Tíu xiâm Đảng, Kăn pơkuâ hnê ngăn Đảng kong pơlê Dak Lak, mơhé hiăng ai pơ’lêh tung pro mơ-éa laga vâ châ tơƀrê păng ‘nâng ƀă djâ Dak Lak mơnhông mơdêk tơxâng tíu cheăng Tíu xiâm kơpong Tây Nguyên, tung la ngiâ, kong pơlê pơtối thăm pro rơdêi pơ’lêh pro mơ-éa, thăm pêi cheăng tiô luât tung pro mơ-éa. Dak Lak châ pơkâ troh hơnăm 2025, ki tâk chu pơ’lêh pro mơ-éa dêi kong pơlê kô ối tung khu 20/63 kong pơlê, pơlê kong kơdrâm.

A Sa Ly tơplôu ƀă tơbleăng