VOV4.Xơ Đăng - Hơnăm hriâm 2021 – 2022, kong pơlê Dak Lak ai lối 34.800 ngế hok tro lâm 12 kô veăng tung rôh tơ’noăng râ má pái phôh thong, ki hên tung kơxô̆ ki kố kô pơtối veăng tung tơdroăng ki tơ’noăng lơ chêh inâi vâ mot hriâm tung mâu hngêi trung Đăi hok, Kao đăng.

Hok tro lâm 12 a tơring Krông Pač, kong pơlê Dak Lak

Vâ pro tơ’lêi hlâu má môi ăm hok khô̆i 12 pơtối rĕng châ tí tăng mâu tơdroăng kal ‘na rôh tơ’noăng ƀă rah xo mot hriâm tung mâu hngêi trung Đăi hok, Kao đăng, Khu ngăn hnê hriâm ƀă mơjiâng tuăn ngoâ rơkê Dak Lak hiăng pơkâ thế mâu hngêi trung mơdêk tơrŭm pơla thái cô pơkuâ lâm ƀă nôu pâ, hok tro ing tơdroăng ki tơpui tơdrêng, pơtroh tin nhăn, xúa măng xah hô̆i zalo, Facebook ƀă hên ki troăng ki ê. Rơtế ƀă mê, mâu hngêi trung kal rak tơniăn mâu tơdroăng ‘na kế tơmeăm kơmăi kơmok vâ kum mâu vâi o drêng chêh inâi, hơ’lêhmâu tơdroăng ki pói rơhêng vâ a mâu hngêi trung klêi kơ’nâi cha mơnhên hiăng plah tơ’noăng râ má pái.

Katarina Nga tơplôu ƀă tơbleăng