Hơhnăm mơhriâm 2023-2024, hngêi trung râ má môi, râ má péa Lê Duẩn, cheăm Ea Puk, tơring Krông Năng ai 710 ngế hok tro a 2 râ hriâm, Sap ing tơdế khế 8, hngêi trung hiăng pêi klêi tơdroăng tăng rah hok tro mot hriâm, hnê hriâm ‘na tơdroăng cheăng ăm khu thái cô a tâi tâng khu lâm, má lối ƀă thái cô hnê khu lâm 4 ƀă lâm 8 tiô tơdroăng hnê hriâm phôh thong hơnăm 2018. Tơdrêng amê, rôe tơ’nôm mâu kế tơmeăm hnê hriâm, tơkŭm kơpuih văng, pro rơnuâ plông, lâm hriâm, mơjiâng mâu túa ki ngiât lĕm, krúa ăm hơnăm hriâm nếo, pôa Nguyễn Duy Nghĩa, Kăn pơkuâ ngăn hngêi trung tối ăm ‘nâi:

‘’Hngêi trung hiăng ‘mâi rơnêu kế tơmeăm, mơjiâng pro hngêi lăm dế, kơpuih văng ‘mâi rơnêu tơmeăm khoăng, môi tiah rôe pul on ƀă rôe mâu tơmeăm ki vâ hnê hriâm ăm lâm 4 ƀă lâm 8. Tơdroăng ki hnê hriâm lâm 5 ƀă  lâm 9 xuân u ối tơmeăm ki ton, mê hngêi trung hiăng rôe tơ’nôm, ’mâi rơnêu  ăm i tŭm’’.

Tơdrêng ƀă tơdroăng ‘mâi rơnêu, mơjiâng pro tơ’nôm mâu tơmeăm ki kŭn, hên mâu tơring, cheăm tung kong pơlê hiăng tơlo liăn ngân troh a chât rơtal liăn kum hngê trung mơjiâng pro nếo kơbong, lâm hriâm, hngêi ăm thái cô ối, plông hngêi trung tro tiô tơdroăng ki tơniăn, krá kâk, tro tiô pơkâ. Ki vâ tối, a tơring Čư̆ Mgar, hơnăm hriâm kố, tơring hiăng mơ’no lối 33 rơtal 500 rơtuh liăn vâ rôe tơmeăm khoăng ki tơdjâk troh tơdroăng hnê hriâm ăm mâu hngêi trung. Troh nôkố, kế tơmeăm ki vâ xúa hnê hriâm tung hngêi trung hiăng bê tŭm vâ rak tơniăn ăm tơdroăng hnê hriâm phôh thong ki nếo. Pôa Nguyễn Tự Do, Kăn Ƀơrô ngăn ‘na hnê hriâm ƀă hnê mơjiâng tuăn ngôa rơkê tơring Čư̆ Mgar tối ăm ‘nâi:

‘’Kơvâ ngăn ‘na hnê hriâm tơring Čư̆ Mgar hiăng hnê thế mâu hngê trung chêh bro hlá mơ-éa tối pơtâng ăm khu kăn, Vi ƀan hnê ngăn tơring pơtối mơ’no liăn rôe tơ’nôm mâu kế tơmeăm vâ kum ăm tơdroăng hnê hriâm ƀă hnối tăng rah mâu thái cô tơniăn tiô tơdroăng pơkâ dêi Khu xiâm ngăn ‘na hnê hriâm ƀă hnê mơjiâng tuăn ngôa rơkê vâ pêi pro tiô pơkâ dêi tơdroăng hnê hriâm phôh thong hơnăm 2018 ƀă tơdroăng hnê hriâm phôh thong dế nôkố, rak tơniăn ăm mâu hngêi trung mot tung hơnăm hriâm nếo ki krâu tơniăn’’.

Hơnăm hriâm 2023-2024, kong pơlê Dak Lak ai lối 1 rơpâu toăng hngêi trung hnê hriâm mâm non troh a râ má pái phôh thong. Hdrối vâ mot tung hơnăm hriâm nếo, kong pơlê Dak Lak hiăng hnê mơhno kơvâ hnê hriâm hnê mơhno ‘na tơdroăng cheăng ăm khu thái cô, tăng rah mâu thái cô maluâ ing mâu hngêi trung ki rơlối thái cô vâ hơ’lêh lăm hnê a mâu hngêi trung ki tá hâi ai tŭm thái cô.

Pơtâng tối, mơhnhôk thế rêm khu râ, kơvâ cheăng veăng tơlo liăn ngân tŏng kum ăm mâu hngêi trung rôe tơmeăm ki hnê hriâm tro tiô tơdroăng pơkâ dêi hnê hriâm phôh thong hơnăm 2018. Hơnăm hriâm kố, tâi tâng khu hnê hriâm dêi kong pơlê hiăng châ mơ’pno liăn lối 965 rơtal liăn mơjiâng pro nếo, ‘mâi rơnêu, rôe tơmeăm khoăng ki hnê hriâm. Jâ Lê Thị Kim Oanh, Kăn phŏ pơkuâ ngăn ‘na hnê hriâm dêi kong pơlê Dak Lak tối ăm ‘nâi:

‘’Vâ tối tơdjuôm ƀă mâu hngêi trung ki ối pá kơdâm dêi Khu ngăn ‘na hnê hriâm ƀă hnê mơjiâng tuăn ngôa rơkê troh nôkố hiăng bê tŭm mâu tơmeăm ki vâ hnê hriâm, maluâ pêi pro tiô pơkâ tơdroăng hnê hriâm hơnăm 2018. Pakĭng mê, ƀă mâu hngêi trung ing râ mầm non, râ má môi, râ má péa hiăng xing xoăng tơdroăng ăm mâu tơring, laga, khu pơkuâ ngăn xuân hiăng thế mâu Bơrô ngăn ‘na hnê hriâm ƀă hnê mơjiâng tuăn ngôa tơkê hbrâ rơnáu tung tơdroăng vêh mơnhên mâu tơmeăm khoăng, vâ ing mê, tối pơtâng ăm Vi ƀan hnê ngăn rêm râ cheăm, tơring vâ hnê mơhno ăm mâu kơxô̆ liăn vâ tơniăn tro tiô tơdroăng hnê hriâm ăm hơnăm hriâm nếo kố’’.

Xuân tiô tối tơbleăng dêi Khu ngăn ‘na hnê hriâm ƀă hnê mơjiâng tuăn ngôa rơkê kong pơlê Dak Lak tối tung hơnăm hriâm hdrối kố nah, lâp kong pơlê ai dâng 30 rơpâu ngế hok tro hiăng mơgêi râ má péa. Tung mê, lối 23 rơpâu 100 vâi o châ mot tung lâm 10 râ má 3 phôh thong, lối 4 rơpâu vâi o châ mot hriâm tung hngêi trung yăo yuk thưmg xuên, mâu hngêi trung hnê cheăng pêi. Ki u ối, 2 rơpâu 400 ngế vâi o tá hâi ai lâm vâ hriâm. Vâ tŏng kum ăm tơdroăng kố, Vi ƀan hnê ngăn kong pơlê Dak Lak hiăng pơkâ thế Khu ngăn ‘na hnê hriâm ƀă hnê mơjiâng tuăn ngôa rơkê pơtối tăng rah xo hok tro ing mâu hngêi trung phôh thong tăng rah tŭm hok tro tiô tơdroăng pơkâ. Tơdrêng amê, vêh mơnhên ngăn nhên kơxô̆ hok tro ki ôh tá teăm bê tŭm lâm hriâm ing cheăm, tơring vâ tơ’mot ăm vâi o châ mot hriâm a mâu trung tâm yăi yuk thương xuên. Mâu tơring, cheăm hiăng kơjo kum tăng liăn ngân vâ rĕng pro klêi mâu kơbong, lâm, hngêi trung, tăng kĭ tơkêa cheăng ƀă mâu thái cô lăm hnê a mâu tíu xiâm yăo yuk thương xuên, hnê mơhno cheăng pêi vâ tơniăn ăm tơdroăng hriâm tâp dêi vâi o hok tro.