VOV4.Xơ Đăng - Mot a rơnó kong mêi têa kân lân lu hơnăm kố, rơtế ƀă tơdroăng đi đo séa ngăn troăng kơxái on tơhrik, Kŏng ti on tơhrik Dak Lak hiăng hbrâ rơnáu tơmeăm khoăng, kơmăi kơmok hbrâ ví kong prâi pro ôh tá tơniăn.

Rơnêu tơ’nhê on tơhrik trung áp xua chêm tro on tơhrik hrik

Tíu cheăng xuân hiăng ai tŭm khu mơngế vâ pêi cheăng hbrâ ví kong prâi pro ôh tá tơniăn, ti tăng tŏng xo mơngế hliăng tiâ, rĕng tơleăng tơdroăng tâng ai mâu tơdroăng ôh tá tơniăn ‘na on tơhrik.

On tơhrik Ea Kar kếo loăng a kơpong trâm kuăn pơlê rêh ối klêi kơ’nâi khía pê têi tơ’lêi tơđôu a troăng kân pro chiâng ôh tá tơniăn on tơhrik

Ki rơhêng vâ tối cho a kơpong mâu tơring Ea Kar, M’Drak, Krông Công mâu tíu đi đo châ hlo mâu tơdroăng ki ôh tá tơniăn ‘na on tơhrik, mâu tíu hiăng thăm xúa flycam, camera nhiê̆t vâ séa ngăn troăng kơxái, ki tô hngíu mâu tơmeăm; séa ngăn, rak ngăn tơmeăm hbrâ mơdât rơkê tơro têa; po văng drô troăng on tơhrik ƀă hía hé. Tơdrêng amê pêi pro mâu troăng mơdât kuăn kiâ kong kơneăng tro troăng kơxái o tơhrik pro chiâng tơpâ, tơniăn mơ’no on tơhrik tơniăn, đi đo.

A Sa Ly tơplôu ƀă tơbleăng