VOV4.Xơ Đăng - Tơdroăng ‘mâi rơnêu pro troăng kân kong kơxô̆ 1 dêi kong pơlê pơla rôh má 2 (ing km 49 troh km 62 tơdjêp tơring Ea Sup ƀă Ƀuôn Đôn) mơ’no tâi tâng kơxô̆ liăn pro vâ chê 84 rơtal liăn. Kố cho tơdroăng tơkêa bro troăng kân ki apoăng châ ‘no mơjiâng pro mơnhông cheăng kâ - rêh ối kơpong tíu tơkăng kong, laga mâu tíu pêi cheăng ki châ rah xo mơjiâng pro ôh tá tơniăn ‘na mâu tơdroăng troăng prôk ki mơni kô tơ’lêi tro xía vâ; mâu troăng prôk ki ‘nâ vâi pro ôh tá krá.

Nâ Hoàng Thị Tiến, hngêi achê troăng kong pơlê kơxô̆ 1, cheăm Čư Mlan, tơring Ea Súp tối, sap ing mâu khu ki mơjiâng pro troăng kân troh pro troăng a ngiâ hngêi mê kơpong kố ai tơdroăng ôh tá tơniăn ‘na troăng klông. Mâu ngế mơjiâng pro troăng kân, thông têa ôh tá ai hlo tâp trăng , lơ kât kơxái lơ tâp kơƀâng tơbleăng tối rơ-iô. Xua mê, kơpong kố hiăng ai hên roh tơklâm rơxế. Roh nếo má môi kơtăn kố pro môi ngế kơnốu hiăng vâ hlâ.

Nâ Hoàng Thị Tiến hơ’muăn:

‘’Sap ing troăng hngêi á to achê pơlê kân hiăng ai 4 – 5 roh tơklâm, krê a ngiâ hngêi á cho hiăng pái roh. Tối tơdjuôm kơnôm khu râ kăn pơkuâ khu ki mơjiâng pro troăng rĕng mơjiâng pro, pro a’ngêi tâ, tâng lôi troăng kân, thông têa môi tiah kố mê cho rơ-iô ‘nâng’’.

Kŏng ti pêi cheăng tiô rơnó Hoài Ân mơjiâng pro troăng kân laga ôh tá tơniăn mâu tơdroăng tơniăn troăng klông

Ƀă pôa Trương Kim Hoàn, hngêi xuân ối achê troăng kân kong pơlê kơxô̆ 1 tơkâ pơlê kân Ea Súp tối ăm ‘nâi, ôh tá xê to mơjiâng pro ôh tá tơniăn troăng klông, mê mơjiâng pro troăng kân ôh tá dâi lĕm. Môi tiah mâu kế klâp thông têa péa pâ troăng nếo klâp mê mơngế prôk ƀă rơxế prôk hluâ hiăng hên kế klâp tơhneăng. Ngăn ƀă mâ xuân hlo ki kreăng pơla meăm ƀă ƀê tông cho ôh tá krá.

Ki krêa dêi ƀê tông ƀă meăm a mâu kế ki klâp ôh tá kreăng dêi pó, tơ’lêi tơhneăng

Pôa Trương Kim Hoàn tối ăm ‘nâi:

‘’Mâu kế klâp mê pơto troh klâp thông têa a ngiâ hngêi, mê á to rơxế honđa tơkâ hluâ mê gá tơhneăng xêh. Mâu kế klâp ôh tá krá kâk, xua mê prôk tơkâ gá tơhneăng xêh, ngăn ƀă mâ xuân hlo meăm ôh tá ai krêa a ƀê tông. Mâu kế klâp kố cho ôh tá dâi lĕm’’.

Tiô pôa Nguyễn Xuân Hà, Kăn hnê ngăn Vi ƀan cheăm Čư Mlan tối, tơdroăng tơkêa bro po rơdâ, rơnêu troăng kân kong pơlê kơxô̆ 1 tơkâ mâu cheăm Čư Mlan xŏn lối 1 km, châ pro ing apoăng hơnăm 2021. Kơpong troăng kố xua Kŏng ti pêi cheăng tiô rơnó môi khu Hoài Ân, tíu pêi cheăng a pơlê kong kơdrâm Ƀuôn Ma Thuột mơjiâng pro. Troh nôkố, ngiâ troăng châ tôh chhá kơxu klêi, mâu tơmeăm ki ê môi tiah thông têa, trăng kơnâng troăng, kơƀâng tơbleăng ƀă hía hé xuân ối dế mơjiâng pro.

Pôa Nguyễn Xuân Hà mơnhên, kăn pơkuâ Vi ƀan cheăm ai tơdah hên rơkong tơpui tối dêi kuăn pơlê ‘na tơdroăng khu ki mơjiâng pro ôh tá tơniăn mâu pơkâ ‘na tơniăn troăng klông. Vi ƀan cheăm hiăng tơkŭm xo rơkong tơpui tối dêi kuăn pơlê klêi mê pơtroh khu râ kăn kơpêng pơkâ mâu khu mơjiâng pro pêi pro tŭm mâu troăng tơniăn troăng klông xuân môi tiah ki dâi lĕm troăng kân.

‘’Klêi kơ’nâi séa ngăn mê hlo tơdroăng kŏng ti Hoài Ân mơjiâng pro thông têa lơ trăng kơnâng troăng, trăng tơbleăng tơniăn troăng klông, tíu tơ’lêi tơklâm rơxế. Vi ƀan hiăng pâ thế ƀơrô cheăng kâ mơjiâng pro troăng klông tơring, Khu pơkuâ tơdroăng tơkêa bro kong pơlê pơkâ khu ki mơjiâng pro kal tơniăn mâu tơdroăng tung tơdroăng mơjiâng pro kông, troăng kân vâ tơniăn ăm kuăn pơlê prôk lăm tơniăn’’.

Hên kế klâp nếo klâp mơngế ƀă rơxế prôk lăm hlo hiăng tơhneăng

Tơdroăng rơnêu troăng kân kong pơlê kơxô̆ 1 hneăng má 2 (sap ing km 49 troh km 62 tơdjêp tơring Ea Súp ƀă Ƀuôn Đôn) ai tâi tâng kơxô̆ liăn mơ’no vâ chê 84 rơtal liăn. Tơmeăm kố xua Khu tơrŭm tê mơdró, mê cho: Kŏng ti pêi cheăng tiô rơnó Hoài Ân, Kŏng ti pêi cheăng tiô rơnó mơjiâng kông, troăng kân Việt Đức, Kŏng ti pêi cheăng tiô rơnó mơjiâng kông troăng kân Đức Nguyên ƀă Kŏng ti tơlo liăn mơnhông mơdêk Đại Việt pro, teăng mâ khu mơ’no liăn cheăng cho Khu pơkuâ tơdroăng tơkêa bro mơ’no liăn mơjiâng pro troăng klông ƀă pêi chiâk deăng mơnhông mơdêk thôn pơlê Dak Lak.

Troh nôkố, mâu khu ki mơjiâng pro hiăng mơjiâng pro châ 80% mâu tơmeăm tơdroăng tơkêa bro. Kố cho tơdroăng tơkêa bro kơjo mơ’no liăn vâ mơnhông mơdêk cheăng kâ – rêh ối pơlê pơla a kơpong tơkăng kong dêi kong pơlê ƀă ai kơlo mơ’no liăn tâk troh chât rơtal liăn. Khu mơ’no liăn kal pơxâu kơtăng mâu khu ki mơjiâng pro ‘’Pêi mơhnuâ’’ xuân môi tiah séa ngăn, kơtăng tung mơhnhôk khu mơjiâng pro, vâ tơniăn troăng klông ví tơklâm rơxế xuân môi tiah ki dâi lĕm mâu troăng klông.

Tuấn Long chêh

A Sa Ly tơplôu ƀă tơbleăng