Ki xiâm dêi Hneăng hôp kố cho pơkâ mơ’no tung 5 hơnăm la ngiâ cho mơdêk ki hlê plĕng nâl Ănglê ƀă tơdroăng ki vâ mot tơrŭm ƀă kong têa ê ăm sinh viên; Rơtế prôk, tŏng kum ƀă mơnhông sinh viên hdroâng kuăn ngo a kong pơlê.

Dak Lak nôkố ai lối 14.400 ngế sinh viên dế hriâm a 12 to hngêi trung Đăi hok, Kao đăng. Tung mê, ai vâ chê 3 rơpâu ngế sinh viên hdroâng kuăn ngo. Tung 5 hơnăm hdrối nah, tơdroăng sinh viên ƀă tơdroăng cheăng dêi Khu ngăn Sinh Việt Nam kong pơlê Dak Lak hlo mơnhông mơdêk ƀă hên tơdroăng ki pêi, kơhnâ, tơ’mot hên droh rơtăm, sinh viên veăng.

Hên tơdroăng cheăng pêi ai pơxúa xua pơlê pơla, môi tiah: Tơdroăng tŏng kum tung rơnó pơtê hriâm, Tŏng kum a rơnó tơ’noăng. Mâu rôh mơhnhôk “Mơjiâng ki kơnía ‘na mâu droh rơtăm Dak Lak chal nếo”, “Rêm hâi ai môi tơdroăng lĕm, rêm măng tĭng ai môi tơdroăng tro” châ sinh viên tơmiât pêi, ƀă veăng. Lối 3 rơpâu ngế sinh viên tơkâ luâ xơpá hiăng châ xo liăn hriâm rơkê ƀă tâi tâng kơxô̆ liăn kơnâ lối 3 rơtal liăn.