Tiô riân ngăn dêi Khu rak ngăn loăng pơlái kuăn kiâ kong kong pơlê Dak Lak, sap ing apoăng hơnăm 2020 troh nôkố, a tíu pêt kong dei Kŏng ti pêt kong Ƀuôn Ja Wầm ai lối 500 rôh ko ‘nhiê kong, ƀă ƀăng tơnêi ki tro hdi tâk troh 360ha.

Pôa Nguyễn Quốc Hưng, ngế pơkuâ Khu ngăn loăng pơlái kuăn kiâ kong kong pơlê Dak Lak tối nhên, Kŏng ti Pêt kong Ƀuôn Ja Wầm ôh tá ai khu ki rơkê ‘na pơkuâ ngăn kong. Mê kong chiâng tro vâi ko ‘nhiê tung pơla ton khế, ƀăng tơnêi kong a tíu ki pêt kong kố dêi kŏng ti dế kơdroh rĕng.

Tung kơxô̆ 8.800 ha kŏng ti kố pơkuâ ngăn, nôkố bu ối dâng 3 rơpâu ha ai loăng ƀă ki hên loăng ôh ti ai xếo. Khu ngăn loăng pơlái kuăn kiâ kong dế thăm pơtroh mâu khu ki gak ƀă hnê mơhno khu rak ngăn loăng pơlái kuăn kiâ kong tơring Čư̆ Mgar tơrŭm ƀă kong pơlê, ngế ki pơkuâ ngăn kong tơbleăng mâu troăng hơlâ pơkâ pêi pro kơtăng tung tơdroăng ki mơdât vâi ko ‘nhiê kong akố.