Tiah mê, tung pơla ing hâi lơ 20/11/2023 troh hâi lơ 29/2/2024, mâu Khu ki ngăn kơchơ tê mơdró ối tung Khu pơkuâ ngăn kơchơ tê mơdró kong pơlê Dak Lak kô séa ngăn ƀă 111 khu tơrŭm, mâu ngế krê dế mơjiâng pro, tê mơdró a kong pơlê.  Hnoăng cheăng séa ngăn kô tơkŭm tung mâu kế tơmeăm ki vâi roê xúa hên tung rôh mơ’nui hơnăm ƀă tung rôh Têt Lo hơnăm nếo môi tiah kơ-ƀăn kĕo, xik, drôu ƀiêr, hât, têa ngeăm, kế tơmeăm điê̆n tưh, kơtuh hngíu, hmân ếo, yêp, chêng khŏng, kế tơmeăm ki châ pro sap ing mơnăn păn, mlŏi pơtôu, mâu plâi reăng ƀă hên ki ê.

Rơtế amê, mâu Khu ki kố kô tơkŭm po séa ngăn mâu tơdroăng tê mơdró têa châu têa kơxăng, vâ pôi tá ăm ai tơdroăng ki ‘măn chôu têa châu, têa kơxăng, mơdêk yă tê ôh tá tro vâ kum rak vế tơniăn ăm kơchơ mơdró tê tung rôh Têt ăm Kuăn pơlê.