Po sap hâi lơ 18/12 ta troh hâi hâi lơ 16/1,  Mơđah tơbleăng tơmeăm um mê ai 3 tơdroăng pêi pro ki xiâm, cho mơđah tơbleăng 97 um kơchuâ xup xo ing roh hdrối mê hía nah ‘na mâu tơdroăng hnê pơtâp lêng hbrâ vâ tơplâ ƀă um kơchuâ xup xo ‘na tơdroăng rêh ối pêi cheăng dêi mau kăn ƀô̆, mâu lêng kuăn pơlê a chuăn Trường Sa; Mơđah 5 phim Phóng sự - Hlá mơ-éa chêh um xup ton nah ‘na Trường Sa, Tơbleăng ăm hlo 21 to chuăn dêi Trường Sa dêi Việt Nam ƀă mâu tơmeăm môi tiah hlá cờ tơnei têa,  hlá cờ lêng têa kơxĭ Việt Nam, Huy hiệu Lêng Trường sa, mâu tơmeăm pêi pro ƀă kŏng ing mâu kơtôu akrot, uâng lâ, hjuô têa kơxĭ xua mâu lêng a chuăn rơlố Trường Sa pro. 

Klêi pơxiâm po leh, hên hĕng kuăn pơlê ƀă tơmối troh lăm ngăn mơđah tơbleăng. Hên ngế tối, mâu um kơchuâ chêh, xup xo mâu tơmeăm pro hên, lĕm hmâ achê kuăn pơlê, tơdrăng ‘na mâu lêng chuăn Trường Sa hên tơdroăng ƀă vâ tối hên tung rêh ối.