VOV4.Xơ Đăng - Hâi lơ 13/4, Khu lo tŏng veăng kong pơlê Dak Lak tơkŭm po tơdah tơdroăng  xing xoăng ăm têa kơdê pơreăng ăm 400 hngêi trung râ má môi ƀă mâm non a kong pơlê Dak Lak. A roh tơdah, kăn teăng mâ khu tŏng kum hiăng pơcháu ăm 10 rơpâu khu tơmeăm kơbốu têa xếo krôk, 13 rơpâu lit têa pơkeăng ƀă 15 kơmăi chuô têa ƀă kơnâ lối 4 rơtal liăn.

Dak Lak: Tơdah tơdroăng xing xoăng ăm têa kơdê pơreăng ăm hngêi trung râ má môi ƀa mâm non

Kơxô̆ kơmăi kơmok kố kô châ xing xoăng ăm 400 hngêi trung râ má môi ƀă mâm non a kong pơlê Dak Lak. Tiô jâ Trần Thị Phương Thu, Kăn phŏ pơkuâ Khu lo tŏng veăng kong pơlê Dak Lak, rơtế ƀă kơmăi kơmok hiăng tơdah, Khu lo tŏng veăng kong pơlê tơrŭm ƀă tíu cheăng tŏng kum pơtối séa ngăn vâ rah xo mâu hngêi trung a kơpong hơhngế hơhngo kal vâ xúa kơmăi chuô têa vâ tŏng kum tơ’nôm tung la ngiâ.

A Sa Ly tơplôu ƀă tơbleăng