VOV4.Xơ Đăng - Tiô Khu pơkuâ ‘na mơhno túa lĕm tro – Tơ’noăng ivá ƀă ôm hyô kong pơlê Dak Lak tung roh pơtê leh 30/4 ƀă lơ 1/5 hơnăm kố, kong pơlê hiăng tơdah vâ chê 56 rơpâu roh tơmối troh lăm ngăn, pơtê, pêi lo liăn châ vâ chê 17 rơtal liăn, tâk 80% tâng pơchông ƀă roh leh hơnăm nah. Tơdroăng ki xúa kơbong tơdâng châ lối 90%. Mâu tíu tê mơdró ôu kâ ƀă tíu ối pơrá pêi pro kơtúa kơƀâng ƀă tê tro yă hiăng tĕm, ôh tá ai tơdroăng hdjip yă tơmối.

Tơmối ôm hyô lăm ôm hêi a kơpong ôm hyô Kŏ Tam

Jâ Nguyễn Thuỵ Phương Hiếu, Kăn phŏ pơkuâ ‘na mơhno túa lĕm tro – tơ’noăng ivá ƀă ôm hyô Dak Lak mơnhên: ‘’Ôm hyô Dak Lak hiăng mơnhên tơmeăm ki rơdêi dêi tơná ‘na tơmeăm ôm hyô. Ƀă kong pơlê hiăng mơjiâng khu pơkuâ tơpui tơno mơngế Dak Lak rơkê, lĕm achê ƀă rak krá tơniăn inâi dêi tơná. Kong pơlê kô pơtối hnê mơhno mâu tíu cheăng rơtế ƀă Kơ koan xiâm ôm hyô pro ti lâi mơjiâng tơmeăm ôm hyô nếo, pro nếo tơmeăm ôm hyô ki ai nôkố.

Xuân môi tiah mơdêk ki hôm hnê mơjiâng mơngế pêi cheăng, thăm pêi pro tơdroăng mơhnhôk tơbleăng kĭ tơkêa ƀă mâu kong pơlê, pơlê kong kơdrâm pro ti lâi vâ mơhnhôk tơmối troh ƀă Dak Lak.

A Sa Ly tơplôu ƀă tơbleăng