Nôkố, mâu tíu tê tơmeăm, siêu thĭ, ƀă kơchơ a pơlê kong kơdrâm Ƀuôn Ma Thuột, kong pơlê Dak Lak, hlo hơniâp ro khât. Mâu khu ki tê ƀă siêu thĭ hiăng rơnuâ, mơđah tê mâu tơmeăm ki kal vâ xúa ăm kuăn pơlê tung rôh Têt. Siêu thĭ Co.opmart Ƀuôn Ma Thuột hiăng ‘măn kơdĭng hên tơmeăm vâ tê tung rôh Têt kơnâ lối 80 rơtal liăn, tung mê tơmeăm pro a Việt Nam châ troh 90%. Siêu thĭ xúa tơdroăng ki roê môi diâp ăm môi, kơdroh yă ƀă hên hĭn tơmeăm sap ing hâi 1/12/2024 troh 28/1/2025.

Khu tơmeăm ki pro tơniăn yă lối 20% cho mâu tơmeăm môi tiah: kế kâ, mâu tơmeăm ki hiăng uâ pơliê, hơ’nêh mâm chu í pêap, kơchâi plâi ƀă mâu tơmeăm kế kâ ki xiâm tung rôh Têt. Vâ tơniăn tơdroăng ki pro tơniăn tung kơchơ tê mơdró a rôh mơ’nui hơnăm ƀă Têt Lo hơnăm nếo Ất Tỵ 2025, Vi ƀan hnê ngăn kong pơlê Dak Lak hiăng pơkâ Túa ‘măn kơdĭng mâu tơmeăm ki xúa.

Nôkố, a 11 khu mơdró kâ ki kân hiăng hbrâ rơnáu mâu tơmeăm kơnâ lối 507 rơtal liăn, pro châ tơdroăng púi vâ dâng 36,4% tơdroăng ki vâ roê dêi kuăn pơlê. Mâu tơmeăm ki rak tơniăn yă mê cho kế kâ, mâm ki hiăng xâ chêh hlâu, têa rơmâ, xik, ƀô̆t ngot, kơchâi plâi, ƀă têa châu têa kơxăng, hyôh on gas.