O Bùi Trần Diễm Quỳnh dế hriâm lâm 9A1, hngêi trung râ má péa Trần Quang Diệu, cheăm Hòa Thuận, pơlê kong kơdrâm Ƀuôn Ma Thuột. O tối, troăng prôk sap ing hngêi troh hngêi trung xŏn lối 2 km, ối tung troăng kân Hồ Chí Minh (troăng kân tơnêi têa 14). Xúa rơxế kơtâu ƀă on tơhrik vâ lăm hriâm, o đi đo hlê plĕng rak tơniăn lĕm:

“Sap ing hngêi á troh hngêi trung mê cho thế lăm a troăng kân tơnêi têa. Á lăm hriâm to rơxế kơtâu ƀă on tơhrik troh hngêi trung châ vâ chê 4 hơnăm kố, drêng prôk mê đi đo tiô luât troăng klông ƀă rơxế kơtâu, truâ muâk rak vế ko, rak tơniăn a kơpong hngêi ‘măn rơxế, ‘măn rơxế tiô troăng ƀă drêng vêh á xuân pêi pro môi tiah mê”.

Hngêi trung râ má péa Trần Quang Diệu, cheăm Hòa Thuận, pơlê kong kơdrâm Ƀuôn Ma Thuột, a ngiâ troăng kân Hồ Chí Minh (troăng kân tơnêi têa 14), kơtăn kơchơ Đạt Lý tá hâi troh 200 met. Péa pâ troăng kân kơpong kố ai hên tíu tê mơdró tơmeăm, xua mê hên hơnăm kố drêng chôu ki kơdrâm mơngế prôk lăm cho kơpong bo hngêi trung ai tơdroăng chôm drô troăng, pro ôh tá tơniăn troăng prôk ƀă rơxế kơtâu.

Thái yăo Nguyễn Văn Dũng – Thái pơkuâ hngêi trung tối ăm ‘nâi, hngêi trung hiăng pêi pro hên troăng tơdâng tơ’mô vâ tơniăn troăng klông ƀă rơxế kơtâu ăm 1.400 ngế hok tro, ki rơhêng vâ tối cho kơpong bo cheăng hngêi trung.

“Tâi tâng mâu chôu koh hlá cơ apoăng măng tĭng, hngêi trung pơtroh mâu chôu sinh hriâm lý thuyết pá kơdâm hlá cơ ƀă tơdroăng pro pơro a tíu mơđah tơbleăng vâ pơtâng troh mâu vâi o hok tro pêi tiô luât troăng klông. Pakĭng mê, hngêi trung xuân hiăng xing xoăng hlá cơ khêi tơrŭm ƀă môi cô hnê chư pêi tơdroăng pơkuâ hnê hok tro a bo hngêi trung drêng vêh ƀă hnê mơhno hok tro prôk tơkâ luâ troăng tơniăn. Tơdrêng amê, hngêi trung xuân ai bo cheăng ki tơ’nôm peăng parŏng ƀă a chôu ki kơdrâm mê lôu vâ hok tro lăm peăng parŏng vâ kơdroh chôm chôu hiăng klêi hriâm vêh a hngêi’’.

            Trung tă Nguyễn Trọng Nghĩa – kăn phŏ pơkuâ Kan sát rak tơniăn troăng klông ƀă rơxế kơtâu Kŏng an kong pơlê Dak Lak tối, vâ tơniăn troăng klông ƀă rơxế kơtâu a mâu bo hngêi trung drô mâu troăng kân tơnêi têa, troăng kân kong pơlê, tung pơla kố nah, kơ koan cheăng hiăng đi đo pơtroh mơngế pêi cheăng a hên bo cheăng hngêi trung vâ hnê prôk troăng, pơkuâ tơdroăng prôk lăm a mâu chôu ki kơdrâm mơngế; tơdrêng amê khŏm séa ngăn pơxâu phâk kơtăng mâu ngế cho hok tro pro xôi pơkâ rak tơniăn troăng klông ƀă rơxế kơtâu môi tiah vê rơxế hon đa kơpêng 50 phân khô̆i drêng tá hâi tŭm hơnăm, ôh tá truâ muâk rak vế ko, ôh tá ai mơ-éa phêp vê rơxế, pơto hluâ kơxô̆ mơngế pơkâ; pơxâu phâk kơtăng mâu nôu pâ ‘na tơdroăng ăm rơxế ăm mơngế tá hâi tŭm hơnăm; tơrŭm ƀă mâu hngêi trung hriâm mơjiâng troăng pêi bo cheăng hngêi trung rak tơniăn troăng klông ƀă rơxế kơtâu...

Trung tă Nguyễn Trọng Nghĩa tối:

            “Vâ tơniăn troăng klông ƀă rơxế kơtâu a mâu bo cheăng hngêi trung, Ƀơrô Kan sát rak tơniăn troăng klông ƀă rơxế kơtâu Kŏng an kong pơlê Dak Lak hiăng tơrŭm ƀă mâu hngêi trung hriâm a mâu troăng tơnêi têa 14, 26 ƀă 27 rơtế kŏng an mâu cheăm, pơtâng tối troh hok tro, nôu pâ, thái cô kơtăng pêi tiô luât prôk troăng kân; pêi pro tơdroăng xing xoăng mơ-éa, pano áp-phích mơjiâng troăng pêi bo cheăng hngêi trung hriâm lĕm, tơniăn. Ngin đi đo mơnhên hnoăng cheăng cho thế đi đo tâ, kơtăng tâ’’.

            Kong pơlê Dak Lak nôkố ai vâ chê 490.000 ngế hok tro ing râ mâm non troh râ má pái, tiô hriâm a 1.006 hngêi trung hriâm. Ki hên mâu hngêi trung hrâm pơrá ối achê mâu troăng kân tơnêi têa 14 (troăng kân Hồ Chí Minh), troăng kân tơnêi têa 26, Troăng kân tơnêi têa 27 ƀă mâu troăng kân kong pơlê, rơtế hên troăng kân a mâu tơring, pơlê krâm ƀă pơlê kong kơdrâm Ƀuôn Ma Thuột, kơpong ai hên rơxế kơtâu pro tơ’lêi ôh tá tơniăn troăng klông ƀă rơxế kơtâu.

Pôa Phạm Đăng Khoa – Kăn ngăn ‘na Hnê hriâm ƀă Hnê mơjiâng tuăn ngôa rơkê kong pơlê Dak Lak tối ăm ‘nâi, tung pơla kố nah, kơvâ cheăng, mâu hngêi trung hiăng pêi lĕm tro tơdroăng tối tơbleăng Luât troăng klông troh hok tro ƀă nôu pâ hok tro, mâu tơdroăng hlê plĕng pêi tiô dêi mâu hok tro ƀă nôu pâ xuân ối iâ. Tơdroăng ki ôh tá tơniăn, pro ôh tá tơniăn troăng klông ƀă rơxế kơtâu a mâu bo cheăng hngêi trung xuân ối ai, ki rơhêng vâ tối chôu klêi hriâm vêh a hngêi.

Vâ tơniăn tơdroăng kố, Khu hiăng xing xoăng ƀă kơvâ cheăng pơtâng tối mơhnhôk nôu pâ, hok tro ƀă kuăn pơlê tung kơpong mơdêk tâ mê nếo tơdroăng pêi tiô luât troăng klông ƀă rơxế kơtâu; drêng tơdah kuăn kal pêi tiô hnê mơhno dêi khu cheăng, mâu ngế ki pleăng hnoăng cheăng; po rơdâ troăng pêi bo cheăng hngêi trung rak tơniăn troăng klông ƀă rơxế kơtâu.

“Vâ tơniăn troăng klông ƀă rơxế kơtâu ƀă mâu vâi o hok tro, mâu nôu pâ ƀă mâu thái cô hnê chư, Khu hiăng tơbleăng hên hlá mơ-éa hnê mơhno mâu hngêi trung ai troăng pêi ƀeăn ƀĕng tơniăn troăng klông, ki rơhêng vâ tối a mâu chôu ki kơdrâm drêng mâu muăn troh hngêi trung ƀă chôu klêi hriâm vêh a hngêi. Mâu hngêi trung a mâu tơring, pơlê kong krâm, pơlê kong kơdrâm xuân tơrŭm krá tơniăn ƀă khu kan sát rak tơniăn troăng klông ƀă rơxế kơtâu vâ pơtâng tối, hnê mơhno tơbleăng luât troăng klông vâ mâu vâi o ‘nâi nhên drêng veăng troăng klông ƀă rơxế kơtâu châ tơniăn’’.

            Ƀă tơdroăng veăng kơtăng dêi mâu khu râ kơvâ cheăng, hlê plĕng veăng troăng klông ƀă rơxế kơtâu dêi nôu pâ ƀă hok tro châ mơdêk, tơdroăng chôm drô troăng kân, pro ôh tá tơniăn troăng klông ƀă rơxế kơtâu a ngiâ bo cheăng hngêi trung a Dak Lak a chôu klêi hriâm vêh a hngêi kô chôa ‘lâng châ tơniăn, kum mơjiâng mâu troăng hngêi trung ngiât lĕm kong prâi, krúa, lĕm ƀă rak tơniăn troăng klông ƀă rơxế kơtâu.