Kơxo lơ 10/1, Vi ƀan Măt trâ̆n Tơnêi têa Việt Nam kong pơlê Dak Lak tơkŭm po tơdroăng “Hơngui pơlê xiâm”, trâm mâ kuăn pơlê ki rêh ối, pêi cheăng kâ a kong têa ê ƀă nhŏng o vâi vêh pơlê tơdah Têt Quý Mão 2023. Kong pơlê Dak Lak nôkố ai dâng 9 rơpâu ngế kuăn pơlê dế rêh ối, pêi cheăng kâ, hriâm tâp a 29 to kong têa ƀă tơnêi tơníu. Tung pơla hdrối nah, kuăn pơlê ki rêh ối, cheăng kâ a kong têa đi đo tơrŭm ƀă pơlê xiâm ƀă mơhno tối hiâm mơno pâ nhuô̆m tơnêi têa, rơtế ƀă kuăn pơlê tung tơnêi têa tơplâ mơdât, rak vế hnoăng pơkuâ chuăn rơlố dêi Tơnêi têa, veăng kum ivá mơjiâng pơlê xiâm.

Tung 5 hơnăm hdrối, kơxô̆ kuăn pơlê ki rêh ối, cheăng kâ a kong têa ê pơtroh ăm kong pơlê Dak Lak cho lối 133 rơtug dollars. A tơdroăng kố, tung tơdroăng ki hơniâp ro ƀă hơtô, mâu kăn hiăng tơmâng tơbleăng tối ‘na ki ai hlâu tung pơla hdrối nah. Tơdrêng a mê hlối tối mâu tơdroăng ki rơhêng vâ dêi kuăn pơlê ki hngế pơlê xiâm, rơhêng vâ kong pơlê pơtối pro tơ’lêi hlâu vâ kuăn pơlê ki rêh ối, cheăng kâ a kong têa ê ‘no liăn, veăng kum mơjiâng ƀă mơnhông pơlê xiâm.