VOV4.Xơ Đăng -  Kơxê lơ 19/5, Hô̆i đong hnê ngăn kong pơlê Dak Lak tơkŭm po hneăng hôp ‘na tơdroăng kal rôh má péa, Hô̆i đong hnê ngăn kong pơlê hneăng má 10 vâ séa ngăn hlá mơ-éa pơtroh, tối tơbleăng séa ngăn, têk kŏng môi tuăn tơbleăng tơdroăng pơkâ ‘na xing xoăng liăn kong pơlê veăng tung tơdroăng tơkêa pro troăng prôk tơdrăng Khánh Hòa - Ƀuôn Ma Thuột (hneăng má 1).

Mâu kăn môi tuăn tơbleăng tơdroăng pơkâ ‘na tơdroăng ki xing xoăng liăn ăm kong pơlê veăng tung tơdroăng tơkêa pro troăng kân tơdrăng Khánh Hòa - Ƀuôn Ma Thuột (hneăng má 1)

A hneăng hôp, Hô̆i đong hnê ngăn kong pơlê Dak Lak hiăng môi tuăn tơbleăng tơdroăng pơkâ ‘na xing xoăng kơxô̆ liăn kong pơlê veăng tung tơdroăng tơkêa pro troăng kân tơdrăng Khánh Hòa - Ƀuôn Ma Thuột (hneăng má 1) cho lối 916 rơtal liăn. Hô̆i đong hnê ngăn kong pơlê Dak Lak pơkâ thế Vi ƀan hnê ngăn kong pơlê kal séa ngăn, mơnhên tối tơdroăng ki nâp liăn kong pơlê vâ ai xúa pơkâ xing xoăng, xúa kơxô̆ liăn tung mâu hơnăm ki pơtối, rak vế tơniăn pêi klêi mâu tơdroăng tơkêa tiô tơdroăng pơkâ; hbrâ rơnáu kơxô̆ liăn ăm mâu tơdroăng tơkêa ki kalpêi pro tơdrêng vâ tơbleăng tơdroăng pơkâ dêi Hô̆i đong hnê ngăn kong pơlê pêi pro klêi hên má môi.