Ki nhên cho a troăng kân Hồ Chí Minh kơpong tơkâ hluâ bêng Quảng Thành, pơlê kong kơdrâm Gia Nghĩa, peăng kơnâng troăng hiăng tơhnâp lối 3 met. Tíu tơhnâp pơtối xŏn, kân rơdâ, tơ’lêi tơdjâk troh dâng 100 rơpŏng kuăn pơlê. A kơpong tơkăng kong a cheăm Quảng Trực, tơring Tuy Đức, tíu rơheăng, tơhnâp tơnêi xuân pơtối rế rơdâ, ƀă ai tơ’nôm tíu rơheăng nếo, xŏn dâng 80 met.

Khu râ kăn pơkuâ hiăng xĕn 66 rơpŏng kuăn pơlê mâu pơlê  Bu Krắk, Bu Prăng, a kơpong rơheăng tơhnâp chiâng tât troăng pro kuăn pơlê ôh ti châ mot kơpong rơ-iô. Râ má môi cho a long têa Dak Nting, cheăm Quảng Sơn, tơring Dak Glong, troăng têa rơlêa hiăng ai hên tíu rơheăng ƀê tong peăng kơnhŏng ƀă pá xôp têa plế, tơ’lêi tơhnâp rơchôa long têa Dak Nting.

Klêi kơ’nâi séa ngăn nhên a mâu tíu tơhnâp, rơheăng, tung roh hôp hâi lơ 5/8, Kăn hnê ngăn Vi ƀan kong pơlê Dak Nông pơkâ mâu khu cheăng, kơvâ cheăng, tơring, cheăm séa ngăn, teăm xĕn kuăn pơlê tơdrêng lo ing tiú ki ôh tá tơniăn. Kơvâ rak tơniăn troăng klông kong pơlê Dak Nông ƀă khu râ kăn pơkuâ pơlê kong kơdrâm Gia Nghĩa hiăng kâng kơnâng tât, tâp kơƀăng tơbleăng kơpong tơ’lêi tơhnah tơhnâp, kơƀăng tơbleăng kơdroh ƀă mâu rơxế prôk lăm hluâ troăng pakĭng Gia Nghĩa (troăng tơdjêp troăng kân tơnêi têa 14 ƀă troăng kân tơnêi têa 28).