Tiô Khu xiâm ngăn troăng prôk kong pơlê Dak Nông, rôh kong mêi têa lân lu mơ’nui khế 7, apoăng khế 8 kố nah hiăng pro tơ’nhiê ó 2 tíu a troăng kân xiâm dêi kong pơlê mê ai 300m Troăng kân Hồ Chí Minh tơkâ luâ bêng Nghĩa Thành, pơlê kong kơdrâm Gia Nghiã; 850m troăng kân 1 dêi cheăm Quảng Tâm, tơring Tuy Đức. Tŭm 2 to troăng kân dêi 2 tơmeăm khoăng xuân tro tơhnâp trâu.

Vi ƀan kong pơlê Dak Nông hiăng tơbleăng tơdroăng thâ pêi tơdrêng ‘na kong prâi ôh tá tơniăn tơ’nhiê péa tíu a troăng, hnê mơhno dêi mâu kơ koan khu râ pơkuâ cheăng kong pơlê rĕng ‘mâi rơnêu pro tíu tơ’nhiê mê, nôkố dế xơpá, malối hâi ‘nâi nhên kơxô̆ liăn vâ ‘mâi rơnêu pro.

Tiô riân apoăng, kal  ai 300 rơtal liăn vâ ‘mâi rêu pro, ‘mâi rơnêu 2 tíu ki hiăng tơ’nhiê mê, kong pơlê dế pâ thế tíu xiâm tơnêi têa veăng kum 150 rơtal liăn ing kơxô̆ liăn ‘măn vâ rơnêu tơmeăm khoăng ki tro tơ’nhiê xua kong prâi pro, rơnêu tíu tơ’nhiê a  troăng kân kơ xô̆ 1. Ƀă troăng kân Hồ Chí Minh, kong pơlê dế kơ-êng Khu xiâm ngăn troăng prôk troh mơnhên kơxô̆ liăn xuân môi tiah vâ rơnêu pro troăng.