Hâi lơ 7/8, Khu ki pêi dêi hnoăng cheăng dêi Khu hnê mơhno cheăng tơnêi têa ‘na hbrâ ví khía mơhot, têa lan lu xua pôa Nguyễn Hoàng Hiệp, ngế xiâm phŏ ngăn chiâk deăng ƀă mơnhông thôn pơlê, kăn phŏ pơkuâ djâ khu kăn kố hiăng lăm ngăn tơdroăng kong mê, têa lân lu, tơhnah tơhnâp tơnêi a kong pơlê Dak Nông. Khu kố pơkâ thế kong pơlê Dak Nông kal rĕng tơbleăng tơdroăng ki ‘na kong mê, khía mơhot vâ hbrâ ví, tŏng kum mâu hnoăng cheăng, tơdroăng cheăng pêi tiô túa ki pêi pro tơdrêng.

Kong mê têa lân lu tung mâu hâi hdrối nah a Dak Nông hiăng bro 2 ngế hlâ, vâ chê 200 toăng hngêi ƀă lối 659 ha ƀăng tơnêi pêt mâu hdrê loăng tro têa lân, hên hngêi trăng troăng klông, hno têa tơ’nhiê ó, tiô riân ki tơ’nhiê châ lối 250 rơtal liăn. Klêi kơ’nâi lăm ngăn a mâu tíu ki tơnêi tơhnah ƀă hno rơchoâ têa tro tơhnâp a Dak Nông, khu kố mơnhên kong mê têa lân lu a Dak Nông dế hlo ôh tá tơniăn.

Kong pơlê kal rĕng tơbleăng tơdroăng pêi pro tơdrêng ‘na hbrâ ví khía mơhot têa kân lân lu vâ ai mâu troăng hơlâ pơkâ tơtro tung mâu tơdroăng ki kal pro tơdrêng ƀă mâu kế tơmeăm ki hiăng tơ’nhiê xua kong mê khía mơhot môi tiah rơchoâ, troăng prôk. Kal tơmiât troh tơdroăng ki tơhnah rơchoâ vâ teăm tối tơbleăng.