Dak Nông kơdroh kơxô̆ rơpŏng kơtiê rĕng má môi kơpong Tây Nguyên. Kố cho tơdroăng ki hên ngế rơhêng vâ ‘nâi plĕng a hneăng hôp mâu kăn mâu hdroâng kuăn ngo tung kong pơlê Dak Nông rôh má 4, hơnăm 2024 pơxiâm po kơxo hâi lơ 15/10 ƀă veăng ai 250 ngế kăn teăng mâ ăm lối 227.000 ngế kuăn ngo tung lâp kong pơlê.

Pơla hơnăm 2019- 2024, tơdrêng ƀă mâu tơdroăng, luât pơkâ tŏng gum dêi Tíu xiâm, kong pơlê Dak Nông hiăng tơrŭm pêi mâu tơdroăng cheăng xiâm, tơbleăng hên tơdroăng pêi, tơdroăng tơkêa pro ‘no liăn cheăng mơjiâng tơmeăm khoăng ki kal, hên túa cheăng kâ, mơnhông tơdroăng xăm kơtiê, tơleăng mơnhên tơdroăng ôh tá ai tơnêi ối, tơnêi pro hngêi, tơnêi pê kâ.

Ing mê, kơxô̆ rơpŏng kơpong kuăn ngo tung kong pơlê Dak Nông kơdoh ing 30,14% hơnăm năm 2019 chu ối 13,24% a mơ’nui hơnăm 2023. Pôa Ngô Thanh Danh, Kăn pơkuâ hnê ngăn Đảng kong pơlê Dak Nông, tơdroăng cheăng ‘na kuăn ngo ƀă tơdroăng pêi pro tiô luât pơkâ tŏng gum kuăn ngo a kong pơlê hiăng châ tơbrê tơxâng hâk mơnê. Hneăng la ngiâ, kong pơlê Dak Nông mơ-eăm kơdroh kơxô̆ rơpŏng kơtiê chu ối pá xôp 10%; 70% kơxô̆ cheăm kơpong kuăn ngo ƀă kong ngo châ mơnhên thôn pơlê nếo.