Pôa Lê Quang Dần, Kăn phŏ pơkuâ ‘na chiâk deăng ƀă mơnhông thôn pơlê dêi kong pơlê Dak Nông, tối ăm ‘nâi, riân troh nôkố, roh kong mêi kân ton hâi tung kong pơlê hiăng pro 1 ngế hlâ, 159 toăng hngêi tro lân lu, vâ chê 360 ha loăng plâi tro têa lân lu ƀă dâng 150 ha klôh păn ká dêi kuăn pơlê têa đik kân. Kong mêi kân xuân hiăng pro tơ’nhê hên hngêi trăng, troăng klông, ki má lối cho troăng kân, rơchôa hno têa.

Troh nôkố, tung kong pơlê Dak Nông ai 79 rơpŏng kuăn pơlê thế xĕn troh tíu tơniăn xua kơpong rêh ối tro têa lân lu, tơhnah tơhnâp. Ki tơtrŏng má môi cho tơdroăng tơhnah tơhnâp a cheăm tơkăng kong Quảng Trực, tơring Tuy Đức dế ôh tá tơniăn. A kố, khu râ kăn pơkuâ ƀă khu cheăng tơring Tuy Đức hiăng xĕn 56 rơpŏng kuăn pơlê dêi 2 ƀon Bu Krăk ƀă Bu Prăng troh ối pơtân a môi hngêi trung hriâm. Kong pơlê Dak Nông hiăng hnê mơhno mâu kơ koan cheăng ti tăng plĕng xiâm kối vâ rơnêu.