Pôa Lê Đình Tusan, Kăn xiâm hnê ngăn Vi ƀan cheăm Quảng Sơn, tơring Dak Glong ăm ‘nâi, kong mêi ton tung mâu hâi kô hía nah hiăng pro long rơchôa Dak Nting, ki kâng a ngo têa krơng Nting, dêi pơlê Nting chiâng tơhnâp trâu, rơheăng, a chê kơpong kâng rơchôa. Xua mê, mâu kăn hiăng djâ tơdrêng hlối 34 rơpŏng kuăn pơlê a kơpong ối pá xôp lăm ối tíu tơniăn.

Tiô tối tơbleăng dêi Vi ƀan tơring Dak Glong, a ‘ngêi ngo peăng pá hơ’vá rơchôa pơlê Nting hlo rơheăng dâng 500m, rơdâ sap 10cm. Ngế pơkuâ pro rơchôa cho khu rak ngăn tơdroăng tơkêa bro ‘no  liăn mơjiâng rơchôa dêi kong pơlê Dak Nông hiăng ối ăm Vi ƀan kong pơlê Dak Nông, thế tăng  tíu pêi cheăng krê tối xiâm ki rơheăng tơhnâp trâu mê xuân môi tiah tăng ngăn têa toăng pêi pro, rak tơniăn rơtâ tá tơdroăng tơkêa bro.