Hơnăm 2023, kơxô̆ rơpŏng kơtiê a kong pơlê Dak Nông xăm 2,8%, tung mê, xăm kơtiê ƀă mâu rơpŏng kuăn pơlê hdroâng kuăn ngo a mê ai 8,1%. Ƀă tơdroăng ăm hlo mê, Dak Nông pơtối djâ troăng ahdrối kơpong Tây Nguyên ‘na kơdroh kơklêa xăm kơtiê  kong pơlê ối má 2 cho Dak Lak ai kơxô̆ ki xăm kơtiê 1,5%.

Pôa Hồ Sỹ Hải, Ngế xiâm ngăn Ƀơrô cheăng pơlê pơla, Khu xiâm ngăn mối đô̆i tro rong ƀă rêh ối pơlê pơla kong pơlê Dak Nông ăm ‘nâi, sap mơjiâng kong pơlê hơnăm 2004 nah troh nôkố, kong pơlê ‘nâi nhên pơkâ xăm kơtiê cho hnoăng cheăng pơêi ki xiâm. Mâu tơdroăng mơ-eăm ƀă hên troăng pêi dêi kong pơlê hiăng pro pơxuá tơxâng hâk mơnê drêng riân tung 20 hơnăm hdrối, Dak Nông cho môi tung 10 to kong pơlê ai kơxô̆ xăm kơtiê rĕng má môi tung lâp tơnêi têa ƀă ối má môi kơpong Tây Nguyên.

Kơxô̆ rơpŏng kơtiê dêi kong pơlê hiăng xăm sap 23,7% a mơ’nui hơnăm 2004 troh nôkố bú ối 5,2%. Kong pơlê pơkâ tơdroăng cheăng pêi hơnăm 2024 xăm 3% rơpŏng kơtiê tơdjuôm ƀă mơ-eăm tâi hơnăm 2025 kô ôh pá ai xếo rơpŏng kơtiê tiô pơkâ ki nếo. Vâi ai tiô mâu pơkâ mê, tơdrêng ƀă tơdroăng xúa mâu luât pơkâ dêi Tơnêi têa, Dak Nông dế tơkŭm pêi hên troăng rơhlâ ki pơxúa ƀă tơƀrê.