Pôa Trần Đình Hiệp, Kăn pơkuâ Khu pơkuâ kế tơmeăm khoăng ƀă kong prâi kong pơlê Dak Nông tối ăm ‘nâi, tơdroăng tơhnah tơhnâp têa kroăng Krông Nô hiăng ai hên hơnăm kố, ki má lối cho klêi kơ’nâi ai mâu tơdroăng tơkêa bro long têa hngêi kơmăi on tơhrik môi tiah long têa hngêi kơmăi on tơhrik Ƀuôn Tuôr Srah ƀă long têa hngêi kơmăi on tơhrik Chư Pông Krông. Pôa Hiệp xuân mơnhên tơdroăng tơhnah tơhnâp têa kroăng Krông Nô ai xiâm kối cho xua tơdroăng hrik xo prêi dêi mâu khu tê mơdró xua tŭm 2 kong pơlê Dak Lak ƀă Dak Nông ăm phêp.

Têa kroăng Krông Nô rế hía rế tơhnâp ƀă rế kân rơdâ. Tiô pôa Hiệp, xua ôh tá mơnhên châ hnoăng ki nhên dêi mâu khu tê mơdró tơdjâk troh xua mê tơdroăng pơxâu phâk tiô hnoăng ƀă tơdroăng chêl thiê̆n ăm kuăn pơlê dế trâm hên pá puât.

            “Xua xiâm kối xua tá hrik xo prêi ƀă long têa hngêi kơmăi on tơhrik xua mê khu pơkuâ on tơhrik – khu mơ’no liăn cheăng cho Ƀuôn Tuôr Srah ôh tá môi tuăn kơlo chêl thiê̆n mê pơkâ kong pơlê thế veăng vâ mâu khu ki hrik xo prêi ki tơdjâk péa pâ rơtế tơrŭm chêl thiê̆n ăm kuăn pơlê. Nôkố pá má môi cho tơdroăng tơhnah tơhnâp môi tiah mê laga mơnhên kơlo tơdjâk, ai to lâi kơpêng hrĭng dêi khu mơ’no liăn cheăng ki lâi cho pá puât, hngêi kơmăi on tơhrik to lâi kơpêng hrĭng, hrik xo prêi to lâi kơpêng hrĭng mê tá hâi chiâng tối mơnhên ti lâi ‘nhiah’’.

            Tiô pôa Trần Văn Khánh, Kăn pơkuâ Kŏng ti on tơhrik Ƀuôn Kuốp, tơdroăng tơhnah tơhnâp a têa kroăng Krông Nô hiăng châ mơnhên xua hên xiâm kối môi tiah tơnêi tơníu, kong prâi, hrik xo prê ƀă tơdroăng pro on tơhrik. Tung mê, ki xiâm cho tơdroăng pro on tơhrik ai hnoăng dêi Kŏng ti on tơhrik Ƀuôn Kuốp. Laga, sap hơnăm 2018 troh nôkố, tơdroăng tơhnah tơhnâp têa kroăng Krông Nô lối rĕng ƀă ai tơdjâk kân ing tơdroăng hrik xo prêi.

Peăng kŏng ti on tơhrik hbrâ chêl thiê̆n tro lŭp ăm kuăn pơlê, laga ƀă pơkâ khu râ kăn pơkuâ tơring thế mơnhên, tối nhên hnoăng dêi tâi tâng khu tê mơdró ia tơdjâk.

            Xuân tiô pôa Khánh, a mâu tíu tơhnah tơhnâp, Kŏng ti on tơhrik Ƀuôn Kuốp hlo nhên hnoăng cheăng chêl thiê̆n. Hdrối nah, mâu ƀăng deăng tơnêi pêt mơjiâng tơmeăm dêi kuăn pơlê tro tơhnâp, khu râ kăn pơkuâ kĭ troăng pêi, kŏng ti ai xiâm kối luât vâ mơ’no liăn chêl thiê̆n. Laga to lâi hơnăm achê kố, khu râ kăn pơkuâ pơkâ Kŏng ti thế môi tuăn ƀă kuăn pơlê tung tơdroăng chêl thiê̆n:

“Nôkố nếo ai tơdroăng, troăng pêi môi tiah hdrối nah mê khu râ kăn pơkuâ tối, xua mâu pơkâ luât, khu râ kăn pơkuâ kĭ troăng chêl thiê̆n nếo mê pơkâ thế Kŏng ti on tơhrik Ƀuôn Kuốp lăm tơpui tơno môi tuăn ƀă kuăn pơlê ‘na liăn chêl thiê̆n, tŏng kum ƀăng tơnêi tơhnah tơhnâp. Troăng chêl thiê̆n, tŏng kum thế châ kơ koan pơkuâ tơnêi têa kĭ mê kŏng ti nếo lo liăn. Hlá mơ-éa hiăng pơtroh rơring, hôp mê hôp tê laga tá hâi klêi ‘nhiah’’.

            Pôa Trần Đăng Ánh, Kăn phŏ hnê ngăn Vi ƀan tơring Krông Nô, kong pơlê Dak Nông tối ăm ‘nâi, tơdroăng chêl thiê̆n tro lŭp tơnêi pêt mơjiâng tơmeăm a têa kroăng Krông Nô tung pơla kố nah xua 2 khu ngế cho mâu kŏng ti hrik xo prêi ƀă mâu kŏng ti on tơhrik pêi pro. Mâu kơpong tơhnah tơhnâp ối tung kơpong chiâk xo prêi châ ăm phêp mê mâu kŏng ti hrik xo prêi tơpui tơno dêi pó môi tuăn chêl thiê̆n ăm kuăn pơlê.

Mâu kơpong tơhnah tơhnâp pakong kơpong ăm phêp ăm mâu khu tê mơdró hrik xo prêi mê peăng Kŏng ti on tơhrik Ƀuôn Kuốp pôu râng hnoăng cheăng chêl thiê̆n.

            Hdrối nah, Vi ƀan tơring kĭ troăng pêi chêl thiê̆n ƀăng deăng tơhnah tơhnâp. Laga drêng vêh séa ngăn Luât tơnêi tơníu 2013 mê ôh tá pơkâ khu râ kăn pơkuâ tơring xo tơvêh tơnêi, chêl thiê̆n tŏng kum xua tơdroăng pêi cheăng dêi hngêi kơmăi on tơhrik pro. Xua mê, tơring hiăng pơkâ mơ’no troăng pêi tơrŭm, tŏng kum Kŏng ti on tơhrik pro. Xua mê, tơring hiăng pơkâ troăng tơrŭm, tŏng kum kŏng ti on tơhrik pêi pro tŭm pơkâ chêl thiê̆n môi tiah hdrối nah, bu phá tơ-ê a troăng má mơ’nui cho kŏng tĭ kĭ troăng pêi chêl thiê̆n. Mơhé mê, peăng Kŏng ti on tơhrik Ƀuôn Kuốp xuân tá hâi môi tuăn, chiâng ai tơdroăng pá ton:

            ‘’Tơring xuân hiăng pêi cheăng ƀă Kŏng ti Ƀuôn Kuốp hên xôh. Tơring hnê mơhno ƀơrô ngăn loăng pơlái kong kế mơnhên mâu troăng ai tá tơbleăng mơnhên, pơtroh a kŏng ti. Kŏng ti ngăn tiô mê vâ kĭ laga kŏng ti pơtối pơkâ kĭ mê trâm pá a tíu kố. Nôkố bu tah lôi môi troăng kố tê: kĭ troăng pêi a râ tơring lơ cho khu mơ’no liăn cheăng – tíu cheăng pêi pro chêl thiê̆n kĭ ăm pêi pro. Pói vâ Kŏng ti Ƀuôn Kuốp tơrŭm krá tơniăn tâ, ki rơhêng vâ tối cho pâ troăng pêi râ kơpêng vâ ai troăng tơleăng’’.

            Nếo achê kố, Kăn hnê ngăn Vi ƀan kong pơlê Dak Nông hiăng hnê mơhno Khu pơkuâ kế tơmeăm khoăng ƀă kong prâi mơjiâng khu séa ngăn, tơrŭm ƀă kong pơlê Dak Lak mơnhên nhên xiâm kối tơnêi tơhnah tơhnâp kĭng têa kroăng Krông Nô ƀă pôu râng hnoăng cheăng rêm pâ tơdjâk vâ rĕng pêi pro tơdroăng chêl thiê̆n tro lŭp ăm kuăn pơlê. Tơdrêng amê, mâu kơ koan tơdjâk dêi kong pơlê kal pêi pro kơtăng a Pơkâ 23 dêi Chin phuh pơkuâ ‘na pơkuâ prêi, hmốu tung têa kroăng ƀă rak vế têa, kĭng têa kroăng.