Kố cho kơxô̆ ngế châ Vi ƀan kong pơlê Dak Nông tơbleăng troh Khu hnê mơhno tơnêi têa ‘na hbrâ ví kong prâi pro ôh tá tơniăn. Sap ing hâi lơ 28/7 troh hâi lơ 18/8, tung kong pơlê Dak Nông ai kong mêi kân ton hâi a hên tíu chiâng pro têa kân lân lu a hên kơpong kuăn pơlê rêh ối ƀă tơhnah tơhnâp tơnêi a mâu kơpong.

Kong mêi têa kân lân lu hiăng pro 2 ngế hlâ xua tro têa lân lu mơhiu, pro lân 275 toăng hngêi, lối 700 ha loăng plâi ƀă dâng 230 ha păn ká xi xŏng. Rơtế a mê, hên hĭn tơmeăm hngêi trăng troăng klông ƀă hno têa tro lŭp xua tơhnah tơhnâp. Tâi tâng tro lŭp tiô riân troh 1.046 rơtal liăn.

Tung roh kong mêi têa kân lân lu kố, Vi ƀan kong pơlê Dak Nông hiăng 2 xôh tơbleăng tơdroăng ki thâ ‘na kong prâi pro ôh tá tơniăn. Tơdroăng rơnêu kế tơmeăm khoăng xua kong mêi têa kân lân lu, kong prâi pro ôh tá tơniăn dêi kong pơlê Dak Nông dế trâm pá puât. Nôkố kơxô̆ liăn hbrâ ví kong prâi pro ôh tá tơniăn dêi kong pơlê bu 2,9 rơtal liăn.

Tơdrêng amê, liăn ngân hbrâ dêi kong pơlê hơnăm 2023 bu lối 74 rơtal liăn. Xua mê, Vi ƀan kong pơlê Dak Nông pơkâ thế Khu hnê mơhno tơnêi têa ‘na hbrâ ví kong prâi pro ôh tá tơniăn tơkŭm, pơkâ Ngế pro xiâm hnê ngăn Chin phuh tŏng kum kơxô̆ liăn ing liăn ngân Tơnêi têa ăm kong pơlê ƀă kơxô̆ liăn 661 rơtal liăn.