Mơgêi roh hôp mê, pôa Lại Xuân Lâm - Kăn phŏ Pơkuâ ngăn Đảng uỷ Khô̆i vêh mơnhên, tơdroăng ki xiâm pơkâ ing kố ta troh drêng ai tơdroăng pơkâ nếo pơtê tơdroăng cheăng ƀă mơjiâng Đảng ƀô̆ nếo, rêm râ Uỷ Đảng ki ối tung khu pơtối rak vế, pêi pro dêi hnoăng cheăng pơcháu, tung mê, ai tá mơjiâng Đảng ƀă hnoăng cheăng ki xiâm tơná; kơdo mơ-eăm hriăn plĕng, veăng Khu hnê mơhno xiâm tơnêi têa, Khu xiâm ngăn ‘na cheăng kal kí tung tơdroăng vêh ‘mâi xing xoăng tơdroăng cheăng khu kăn pơkuâ.

Rêm râ Uỷ Đảng ki ối tung khu pơtối pêi pro lĕm tro hnoăng cheăng kal kí, ‘na tuăn mơno, thăm mơdêk hnoăng cheăng hnê tối vâ tâi tâng khu kăn ƀô̆, đảng viên pêi pro klêi hnoăng cheăng ƀă loi tơngah păng ‘nâng troh a tơdroăng pơkuâ ngăn dêi Đảng tung tơdroăng ki vêh ‘mâi xing xoăng hnoăng cheăng, rah mơngế, bú rah iâ mơngế pêi cheăng tung khu kăn pơkuâ hnê ngăn.