VOV4.Xơ Đăng - Kơxo lơ 6/7, a Hà Nội, Đảng ƀô̆ Khô̆i mâu kơ koan Tơnêi têa tơkŭm po Rôh hôp Khu pơkuâ rôh má 9. Rôh hôp mơgêi hnoăng cheăng 6 khế apoăng hơnăm ƀă troăng hơlâ pơkâ ki kal 6 khế mơ’nui hơnăm dêi Đảng ƀô̆ Khô̆i. 6 khế hdrối nah, Đảng ƀô̆ Khô̆i mâu kơ koan Tơnêi têa pơtối séa ngăn kơtăng tung tơdroăng pơkâ Hneăng hôp kân 13 dêi Đảng, Tơdroăng pơkâ dêi Đảng ƀô̆ Khô̆i, mâu túa pơkâ hnê mơhno nếo dêi Tơnêi têa vâ pêi pro nhên hơ’lêh tơdroăng ki kal ƀă mâu tơdroăng pơ’lêh tung tơdroăng pêi cheăng.

Đảng ƀô̆ khô̆i mâu kơ koan Tơnêi têa tơkŭm po Rôh hôp Khu pơkuâ ngăn rôh má 9

‘Na hnoăng cheăng mâu khế ki u ối dêi hơnăm kố, pôa Nguyễn Thành Nam, Kăn pơkuâ Vi ƀan séa ngăn, Đảng ủy Khô̆i mâu kơ koan Tơnêi têa tối nhên, Đảng ƀô̆ Khô̆i kô pơtối hơ’lêh nếo, mơdêk ki rơkê xêt, tơƀrê tơdroăng pơkuâ, hnê mơhno ƀă tơkŭm pêi pro hnoăng cheăng séa ngăn. Pêi pro đi đo, tâi tâng hnoăng cheăng séa ngăn, pơxâu dêi Đảng vâ kum hnoăng cheăng kal kí, hnoăng cheăng mơjiâng, ‘mâi rơnêu Đảng krúa, rơdêi.

Katarina Nga tơplôu ƀă tơbleăng