Thôn 4, cheăm Phước Cát 2 kơtăn ing tơring Cát Tiên ai 40km, ai vâ chê 50 rơpŏng, 160 pơ’leăng mâ mơngế hdroâng kuăn ngo. Cho môi ngế kuăn dêi pơlê, đảng viên Điểu K’Điệp đi đo tô tuăn ƀă mâu tơdroăng xơpá tung rêh ối, tung tơdroăng pêi chiâk deăng dêi kuăn pơlê. Sap a hơnăm 2016, drêng to pêi hnoăng cheăng pro Ngế pơkuâ Măt trâ̆n thôn 4, pôa hiăng pêi tro hnoăng cheăng cho ngế ki djâ troăng pơla khu kăn pơkuâ hnê ngăn Đảng, mâu kăn pơlê cheăm ƀă kuăn pơlê, pêi mâu tơdroăng cheăng mơjiâng tơdroăng rêh ối lĕm tâ.

Mê cho, Điểu K’Điệp hiăng rơtế ƀă kăn ƀô̆ tung thôn tơkŭm pêi hên tơdroăng cheăng rơtế hnê tối mơhnhôk ăm tơtro, đi đo lăm pôu tơrêm hngêi hnê mâu kuăn pơlê pêi troăng rơhlâ dêi Đảng luât tơnêi têa vâ kuăn pơlê ‘nâi nhên ƀă pêi pro. Pakĭng mê, tăng ‘nâi plĕng tơdroăng púi vâ dêi kuăn pơlê vâ teăm tối ăm râ ủy, mâu kăn pơlê cheăm. Điểu K’Điệp ăm ‘nâi, vâ kuăn pơlê loi ƀă pêi ƀối mê tơná pôa thế djâ troăng pêi ahdrối:

“Á hnê kuăn pơlê thế kơhnâ pêi cheăng, hơ’lêh hdrê pêt păn mơnăn, hdrê pêt môi tiah hdrê loăng plâi hôt, tâng loăng hiăng krâ thế hơ’lêh pêt hdrê loăng ki ê, la ôh tá chiâng hơ’lêh hên. Tâng pêt 1 ha mê thế hơ’lêh 1 sao tê, xua tâng hơ’lêh tâi mê xo ki klâi ah vâ kâ. Klêi mê, klâng xuân tiah mê há, hnê tối ăm kuăn pơlê thế ngăn lơ ai pơreăng, ôa hdrong kâ ‘nhiê la tâng pêi klâng thế hơ’lêh roh mơdâ pêt. Tâng ‘na pơkâ ai kuăn preăng kuăn iâ mê bú ai môi péa ngế kuăn tê’’.

Hơ’lêh tuăn tơchĕng tơmiât sap mâu tơdroăng pêi ki kŭn, tơdroăng rêh ối dêi kuăn pơlê hdroâng kuăn ngo a thôn 4, cheăm Phước Cát 2 hiăng hơ’lêh phá tơ ê, mâu túa ki ôh pá tro ton nah hiăng châ tah lôi. Nôkố, hngêi ki lâi xuân kơhnâ pêi cheăng kâ, xúa ki rơkê dêi khoa hok kih thuât tung pêi chiâk deăng. Ngiâ méa pơlê xuân rế hơ’lêh. Mâu troăng prôk hiăng bâ phuâng,  hngêi ối dêi rêm rơpŏng đi đo krúa lĕm, kơdroăng păn mơnăn châ pro a hơngế ing tíu ối hlối mơgrúa krúa lĕm.

Tơdroăng cheăng kâ rêh ối, kuăn pơlê châ mơnhông, pơtối rak vế tơdroăng ton nah túa vêa vong dêi kuăn ngo tơná. Mâu khu tŏn chêng koăng, kơhnhon xuăng khu kơtu ƀa long vâi kơnốu, khu peăng ƀa long vâi kơnốu ƀă kơdrâi dêi thôn đi đo kơhnâ pêi hên tơdroăng cheăng a mâu rôh tơ’noăng xua cheăm, tơring tơkŭm po. Điểu K’Điệp hơ’muăn tối tiah kố:

 “Kuăn pơlê a kố khu tŏn chêng xuân ai, khu kơhnhon xuăng xuân ai há; khu tĕn pong, chêa, kơtŏn kơtum nếo, thăm nêó, ối ai hên mâu ngế rơkê tĕn pong chêa. A hnê kuăn pơlê pôi tá lôi túa lĕm tro pin, thế pơtối rak vế. Túa lĕm tro kuăn ngo pin, pin thế ‘nâi rak vế dêi’’.

Tiô pôa Đường Bình Độ, Kăn hnê ngăn Vi ƀan Măt trâ̆n tơnêi têa dêi cheăm Phước Cát 2, thôn 4 cho cheăm hngế hngo, xơpá ‘na troăng prôk, tơdroăng cheăng kâ rêh ối xuân pá puât hên. Nôkố thôn hiăng hơ’lêh tơƀrê tâ, tŭm tơdroăng, tung mê ki ối chôu pâ má môi cho mơjiâng thôn pơlê nếo, xăm kơklêa kơdroh kơtiê krá tơniăn ton. Kuăn pơlê hiăng hlê plĕng, ‘nâi tơmiât vâ mơ-eăm pêi cheăng kâ vâ mơnhông tơdroăng rêh ối, mê cho ai hnoăng veăng ‘no dêi hnoăng hên ing đảng viên hơnăm ối nếo Điểu K’Điệp, Ngế pơkuâ ngăn ‘na tơdroăng cheăng Măt trâ̆n dêi thôn 4:

 “Hnê mơhnhôk kuăn pơlê pêi pro mâu troăng rơhlâ dêi tơnêi têa cho tro păng ‘nâng. ‘Na mơnhông cheăng kâ mê tung mâu hơnăm hdrối mê hía nah kuăn pơlê a thôn 4 đi đo kơhnâ pêi cheăng kâ, tơdroăng rêh ối - cheăng kâ châ mơnhông tơtêk, tơdroăng ‘na kuăn ngo châ tơbleăng hnê pêi kơhnâ khât. Tung mâu hơnăm hdrối mê hía nah, tơná ngoh Điểu K’Diệp đi đo kơhnâ hnê kuăn pơlê rak vế pêi pro tơdroăng cheăng pêi tơdjuôm, môi tiah tơdroăng mơjiâng thôn pơlê nếo, mâu tơdroăng pêi pro xua cheăm ƀă tơring mơhnhôk pêi’’.

Ƀă mâu hnoăng veăng ‘no kơhnâ khât tung mơjiâng thôn pơlê Điểu K’Điệp hiăng hâk tơngăm châ Vi ƀan Măt trâ̆n tơnêi têa Việt Nam kong pơlê Lâm Đồng khĕn kơdeăn ƀă diâp ăm ƀâng kơdeăn khĕn cho Ngế pơkuâ ngăn ‘na Măt trâ̆n kơpong kuăn ngo kơhnâ rơkê pơla hơnăm 2016-2021./.