Hdrối mê, kơhâi dế lơ 9/9, o Rơ Châm Ư rơtế o kơnốu cho Rơ Châm Chuân (kot mâ hơnăm 2015) ƀă 3 ngế pú hmâ cho Chúc (kot mâ hơnăm 2013, Vâng (kot mâ hơnăm 2012) ƀă H’Lia (kot mâ hơnăm 2015) djâ dêi pó lăm hêi a chê kơpong klôh têa a pơlê Bui (cheăm Nghĩa Hưng).

Xua kong tô xua mê 3 ngế o cho Rơ Châm Chuân, Chúc ƀă H’Lia chu klôh têa hum. Drêng hum mê tŭm 3 ngế klâk têa. Hlo tiah mê, o Rơ Châm Ư tơdúa tung klôh têa toi châ tŭm 3 ngế o cho Chúk, H’Lia, Rơ Châm Chuân to a kĭng. Tŭm 3 ngế o kŭn drêng châ tŏng pơrá ôh tá hro, laga klêi kơ’nâi pơlât, o H’Lia ƀă Ư hiăng prêi lĕm.

Ƀă o Rơ Châm Chuân, o kơnốu Rơ Châm Ư ôh tá mơhúa hiăng hlâ xua klâk têa. Klêi kơ’nâi ‘nâi tơdroăng khên tơnôu dêi o Rơ Châm Ư, Khu xiâm pơkuâ Đoân Droh rơtăm Kŏng san Hồ Chí Minh hiăng pơkâ diâp kơlŏng  ‘’Rơxông ối nếo khên tơnôu’’ ăm o.