VOV4.Xơ Đăng - Kơxê lơ 20/6, a pơlê kong kơdrâm Kon Tum, Khu chêh hlá tơbeăng kong pơlê Kon Tum tơkŭm po trâm mâ tơbâ 97 hơnăm Hâi hlá tơbeăng kăch măng Việt Nam lơ 21/6 ƀă diâp Pri hlá tơbeăng kong pơlê Kon Tum rôh má 10 hơnăm 2022.

Diâp Pri A ăm 5 ngế ki chêh ƀă khu ki chêh hlá tơbeăng

Pri hlá tơbeăng kong pơlê Kon Tum rôh má 10 tơdah xo 56 to ƀai tơ’noăng ối 5 túa hlá tơbeăng dêi 22 ngế chêh ƀă 6 khu chêh veăng tơ’noăng. Tung mê, túa hlá tơbeăng in ai 14 to ƀai, hlá tơbeăng điê̆n tưh ai 17 ƀai, tơpui tung rơ’jíu ai 11 ƀai, um tơvi 11 ƀai ƀă um hlá tơbeăng ai 3 ƀai. Mơnhên tối dêi Khu tơkŭm châm điêm mơhá Pri ăm hlo, mâu hlá tơbeăng rak tro inâi, tơdroăng ki kal hiâm mơno, troăng pơkâ tơmiât dêi Tơdroăng pơkâ tơ’noăng ƀă tối tâi tâng mâu kơvâ cheăng. Hô̆i đong Pri tơ’noăng hlá tơbeăng kong pơlê Kon Tum hiăng diâp 5 Pri A, 5 Pri B, 9 Pri C ƀă 8 Pri mơhnhôk.

Katarina Nga tơplôu ƀă tơbleăng