Hdrối mê, ing tơdroăng ăm 'nâi dêi kuăn pơlê, hâi lơ 5/10, kăn ƀô̆, mâu lêng Đô̆i K51 tơkŭm séa ngăn a pơlê Tusvai, cheăm Đăk Đam, kong pơlê Mondulkiri. Vâ châ achê tíu, khu lêng tăng hlo athế prôk lăm lối 2 chôu, prôk tung kong, tơkâ têa kroăng. Klêi kơ'nâi chiâ troh tung tơnêi lối 60 cm, mâu lêng châ hlo hên tơmeăm ki ai tơdjâk troh mô đô̆i hlâ tung tơplâ xâ. Péa kơxêng kiâ ối kơtăn dêi rơpó dâng 2 met, kơtăn kĭng têa kroăng lối 50 met ƀă achê môi xiâm loăng kân. Klêi kơ'nâi mơnhên, tíu pêi cheăng tơkŭm, djâ vêh 'măn rak, ƀă xối tơbâ a tíu xối pleăng mố đô̆i hlâ.

Tiah mê, klêi kơ'nâi 20 hâi pêi pro hnoăng cheăng rơnó mơdrăng 2026-2027 a kong têa Kul, Đô̆i K51 hiăng tơkŭm châ 3 kơxêng kiâ mố đô̆i. Tơdroăng kố veăng kum pêi pro Tơdroăng cheăng pêi thâ 500 hâi măng, djâ mâu mố đô̆i hlâ vêh ƀă dêi pơlê xiâm.