-Ô pôa, kong pơlê Kon Tum ai lối 292 km troăng tơkăng kong tơkăng ƀă Lếo ƀă Kul, khu mô đô̆i gâk tơkăng kong Kon Tum hiăng mơnhông hnoăng ki xiâm tung gâk kring hnoăng pơkuâ tơnêi tơníu, gâk kring tơkăng kong tơnêi têa môi tiah lâi?

-Đăi tă Trần Ngọc Tùng: Kong pơlê Kon Tum, ai troăng tơkăng kong xŏn nhên khât cho 292,913 km, tơkăng ƀă kong pơlê Rattanakiri, kong têa Kul ƀă kong pơlê Attapeau, kong pơlê Sekong, kong têa Lếo. Kơpong tơkăng kong ai 13 cheăm ối tung 4 tơring tơkăng kong. Tung pơla kố nah ngin đi đo pêi kêi đeăng mâu hnoăng cheăng kơpêng mê, pêi pro tro tơdroăng cheăng, hnoăng cheăng; đi đo cho khu ki xiâm, pêi cheăng tung pơkuâ, gâk kring tơkăng kong tơnêi têa. Vâ pơkuâ, gâk kring krá tơniăn hnoăng pơkuâ, tơnêi tơníu, gâk kring tơkăng kong tơnêi têa, Mô đô̆i gâk tơkăng kong kong pơlê tơkŭm pêi pro mâu troăng pêi ki nhên, mê cho: Hlê plĕng pêi pro trâu hơngế mâu hnoăng cheăng châ pơcháu troh 100% kăn ƀô̆ mâu lêng; Pêi pro tơtro tơdroăng tơpui kâ pakong tơkăng kong, ki rơhêng vâ tối cho tơpui tơno ƀă kuăn pơlê, tơrŭm krá tơniăn ƀă mâu khu gâk kring tơkăng kong tơnêi têa ki kơkăng, tơleăng lĕm tro mâu tơdroăng tơdjâk troh tơkăng kong, tơnêi tơníu; Pêi pro tơdâng tơ’mô mâu troăng pơkuâ gâk kring tơkăng kong, đi đo tơpui tơno, tơrŭm ƀă mâu khu pêi cheăng Kŏng an, Khu lêng, Khu pơkuâ xo hnoăng mơhá...tung tơdroăng hbrâ mơdât mâu ngế xôi gâk kring krá tơniăn kal kí tơniăn lâp pơlê pơla a kơpong tơkăng kong’’.

           -Vâ ‘’Đông lêng cho hngêi, tơkăng kong cho pơlê xiâm, kuăn pơlê mâu hdroâng kuăn ngo cho nhŏng o xiâm, khu mô đô̆i gâk tơkăng kong Kon Tum hiăng ai mâu tơdroăng pêi ki nhên tiah lâi?

-Đăi tă Trần Ngọc Tùng: Vâ pêi pro lĕm tro inâi kơpêng, Đảng ủy, Khu xiâm pơkuâ Mô đô̆i gâk tơkăng kong kong pơlê đi đo tơtrŏng tơdroăng pơkuâ, hnê mơhno tơdroăng hnê tơdroăng kal kí tuăn tơmiât, hnê hriâm tiô khôi vâi krâ nah ƀlêi trâng dêi đông, khu lêng vâ kăn ƀô̆, mâu lêng hlê plĕng ƀă thăm hâk vâ ƀă tíu dêi tơná pro đông. Pakĭng pêi pro lĕm tro hnoăng cheăng kal kí, pơkuâ gâk kring krá tơniăn hnoăng pơkuâ tơnêi tơníu, gâk kring tơkăng kong tơnêi têa ối pêi tơtro tơdroăng pơtâng tối, mơhnhôk mơdêk hlê plĕng, mơnhông hnoăng cheăng dêi khu râ kăn pơkuâ hnê ngăn Đảng, khu râ kăn pơkuâ, mâu khu cheăng, rêm râ kơvâ cheăng kong pơlê, kuăn pơlê thăm veăng rơtế ƀă Mô đô̆i gâk tơkăng kong pơkuâ, gâk kring tơkăng kong, rak krá tơniăn kal kí, tơniăn lâp pơlê pơla tung pơlê cheăm; mơjiâng kơpong tơkăng kong hơniâp lĕm, tơniăn ƀă mơnhông mơdêk’’.

-Châ ‘nâi khu Mô đô̆i gâk tơkăng kong Kon Tum xuân đi đo tơrŭm séa ngăn, gâk kring tơkăng kong ƀă khu mô đô̆i gâk tơkăng kong Lếo ƀă Kul. Tơdroăng pêi cheăng kố mơni djâ hên ki kơnía khât hôm cho pôa?

-Đăi tă Trần Ngọc Tùng: Séa ngăn gâk kring tơkăng kong cho môi hnoăng cheăng ki kal dêi khu mô đô̆i gâk kring tơkăng kong. Tung pơla kố nah khu Mô đô̆i gâk kring tơkăng kong dêi kong pơlê Kon Tum đi đo tơkŭm po séa ngăn pơla péa pâ ƀă mâu khu gâk kring tơkăng kong dêi Lếo ƀă Kul. Sap apoăng hơnăm 2024 troh nôkố khu mô đô̆i gâk kring tơkăng kong kong pơlê tơkŭm po séa ngăn pơla péa pâ 30 roh/360 roh kăn ƀô̆ mâu lêng veăng. Tơdroăng kố gum khu gâk kring tơkăng kong péa pâ teăm tơdrêng tối ăm dêi pó tơdroăng, rơtế dêi pó tơleăng mơnhên mâu roh tơdroăng a tơkăng kong; gâk kring troăng tơkăng kong, tơneăn tơkăng kong. Rak kơtăng mâu Pơkâ tơkăng kong, Pơkâ kơthô vê hdró tâp tơneăn tơkăng kong ƀă mâu tơdroăng môi tuăn ki rêm pâ hiăng kĭ. Tơdrêng amê tối, tơpui tơno tơdroăng, pâ thế a khu râ kăn kơpêng mâu troăng kum rak tơdroăng ki tơniăn tung gâk kring kơpong tơkăng kong ki tơkoh. Pakĭng mâu tơdroăng séa ngăn pơla péa pâ, khu mô đô̆i gâk kring tơkăng kong kong pơlê đi đo tơkŭm po tơpui tơno a tơkăng kong, teăng dêi pó tơpui tơno, lăm pôu diâp tơmeăm khoăng klăng mâu hâi leh, Têt...ƀă khu gâk kring tơkăng kong Lếo ƀă Kul.

-Ô pôa, khu mô đô̆i gâk tơkăng kong Kon Tum hiăng pêi pro ki klâi vâ kuăn pơlê ƀă mâu khu cheăng a troăng tơkăng kong Lếo ƀă Kul rơtế thăm veăng tơrŭm tung gâk kring hnoăng pơkuâ tơnêi tơníu, gâk kring tơkăng kong tơnêi têa?

-Đăi tă Trần Ngọc Tùng: Vâ mơnhông tơdroăng cheăng, hnoăng cheăng dêi kuăn pơlê ƀă mâu khu cheăng pro đông tung kong pơlê thăm tơrŭm hnoăng pơkuâ tơnêi tơníu, gâk kring tơkăng kong tơnêi têa. Khu xiâm pơkuâ Mô đô̆i gâk tơkăng kong dêi kong pơlê hiăng pêi pro mâu troăng pêi ki nhên: Pêi lĕm tro tơdroăng tơbleăng ăm Khu râ kăn pơkuâ hnê ngăn cheăng Đảng kong pơlê, Vi ƀan kuăn pơlê kong pơlê pơkuâ, hnê mơhno râ kăn pơkuâ hnê ngăn cheăng Đảng, khu râ kăn pơkuâ tơring, mâu râ, mâu kơvâ cheăng hlê plĕng pêi pro châ tơƀrê Luât tơkăng kong tơnêi têa, troăng pêi cheăng ton xŏn gâk kring tơkăng kong tơnêi têa ƀă mâu Pơkâ, pơkâ pêi pro, mâu tơdroăng pơkâ tơkăng kong, tíu tê mơdró ngi kong têa ê ƀă hía hé... Pơkâ ‘na mơnhông cheăng kâ, rêh ối pơlê pơla ƀă gâk kring tơnêi têa, gâk kring kơpong tơkăng kong ki má môi cho Pơkâ Ngế pro xiâm hnê ngăn Chin phuh ‘na ‘’tơkŭm po tơdroăng tâi tâng kuăn pơlê veăng gâk kring hnoăng pơkuâ tơnêi tơníu, gâk kring tơkăng kong tơnêi têa tung rơxông nếo’’. Hơnăm 2024 ai 76 khu pú hên, 284 rơpŏng, 273 ngế krê ối tung 13 cheăm tơkăng kong kĭ pơkuâ xêh troăng tơkăng kong, tơneăn; 93 tôh kĭ pơkuâ xêh gâk kring tơniăn thôn pơlê. Hiăng hnê mơhno mâu Đông mô đô̆i gâk tơkăng kong tơkŭm po pro nhŏng o ƀă mâu tíu cheăng gâk kring tơkăng kong dêi kong pơlê Attapeau, Sekong, koing têa Lếo ƀă tơbleăng pêi pro châ tơƀrê tơdroăng pro nhŏng o Pơlê – Pơlê pơla mâu kơpong kuăn pơlê rêh ối péa pâ tơkăng kong. Mơdêk pơtâng tối mơdêk hlê plĕng dêi mâu râ, mâu kơvâ cheăng ƀă kuăn pơlê tung mơjiâng tơdroăng gâk kring tơkăng kong tâi tâng kuăn pơlê ƀă tơdroăng gâk kring tơnêi têa tâi tâng kuăn pơlê – Tơdroăng gâk kring kuăn pơlê. Đi đo pơhlêh nếo tơdroăng xiâm, troăng pơtâng tối mơhnhôk kuăn pơlê ƀă veăng mơjiâng mâu troăng pêi, tơmeăm pro, tơdroăng cheăng kum kuăn pơlê mơnhông pêt mơjiâng tơmeăm, păn mơnăn mơnôa; mơdêk tơdroăng rêh ối kế tơmeăm khoăng, hiâm mơno vâ Kuăn pơlê veăng xêh tung mâu tơdroăng pêi, tơdroăng gâk kring kal kí, tơniăn lâp pơlê pơla, veăng gâk kring troăng tơkăng kong, tơneăn tâp hdró tơkăng cho tíu ki hdró hnoăng pơkuâ tơnêi tíu dêi tơnêi têa’’.

-Mơnê kơ pôa hiăng mơdoh chôu phut ăm roh tơpui tơno, êng tiâ kố!