A hneăng hôp tơpui tơno, mâu kăn teăng mâ tối tơdroăng ki ai khât nôkố, xua hên xiâm kối, tơdroăng ki ôh tá tơdâng pơla kơdrâi ƀă kơnố xuân ối a tung pơlê pơla, chiâng tơdroăng ki tơmiêt krê ôh tá tro ‘na kơdrâi kơnố. Xua mê, ƀă mâu tơdroăng ki rơkê tro ƀă tơdroăng ki nôkố châ tơmâng xo, droh rơtăm tối tơdjuôm, droh rơtăm hdroâng kuăn ngo tối krê kal thế cho khu ki djâ troăng ahdrối tung tơdroăng pơtâng tối pơhlêh hlê plĕng dêi mâu ngế ki rơtâ tá ‘na tơmiêt krê ôh tá tro ‘na kơdrâi kơnố. Sinh viên Triệu Thị Nhung, hdroâng kuăn ngo Dao, Hngêi trung Đăi hok Sư phạm – Đăi hok Đà Nẵng, tối:

‘’A pơlê á o xuân ối ai tơdroăng môi tiah kơdrâi drêng hriâm klêi râ má péa lơ râ má pái mê thế ối a hngêi pêi cheăng lơ lăm xo kơnố. Xua mê ngế krâ tối vâi kơdrâi mơhé hriâm hên mê xo ah hmôi lăm xo kơnố mê xuân ôh tá kum pơxúa klâi ăm rơpŏng hngêi. Xua mê vâi kơdrâi hmâ thế dêi kuăn tơná rĕng xo kơnố ƀă pơtê hriâm. Tiô á o tơmiêt a kơpong á droh rơtăm thế tối mâu tơdroăng tơmiêt dêi tơná vâ pơhlêh mâu tơdroăng tơmiêt ki ôh tá tro mê’’.

Mâu kăn teăng mâ tối, vâ pơhlêh troăng tơmiêt krê ôh tá tro ‘na kơdrâi kơnố pơkâ thế ai tơdroăng ki tơdjêp dêi hên tơdroăng, ing hnê hriâm, troăng hơlâ troh khôi túa lĕm tro pơlê pơla.

Tung mê kal thăm hnê hriâm ‘na tơdâng tơ’mô pơlâ kơdrâi kơnố tung hngêi trung, pêi pro tơdrêng tung mâu tơdroăng hnê mơjiâng xuân môi tiah mơhnhôk sinh viên veăng mâu khu tơrŭm đoân theh, mâu tơdroăng pơlê pơla. Ing mê mơdêk hlê plĕng vâ tơleăng mâu tơdroăng krê xuân môi tiah pơtâng tối tung pơlê pơla. Jâ Hoàng Thị Hạnh, Ngế xiâm phŏ, Kăn phŏ pơkuâ Viƀan Hdroâng kuăn ngo tối, droh rơtăm hdroâng kuăn ngo ‘na kuăn pơlê, khôi túa lĕm dêi hdroâng kuăn ngo tơná. Vâi kô ai troăng pêi ki tơtro vâ chôa ‘lâng troh tah, xut tah troăng tơmiêt krê ki ôh tá tro ‘na kơdrâi kơnố.

‘’Hnoăng cheăng ki kal drêng droh rơtăm tâng tơkŭm po mâu tơdroăng vâ pơtâng tối ƀă tơdroăng rơhdruê, axoâng tiô khôi vâi krâ nah; ƀă mâu tơdroăng pêi ki tro dêi tơdroăng hôp dêi mâu kâu lăk ƀô̆, tơkŭm po mâu tơdroăng trâm mâ pơla pơlê pơla dêi hdroâng kuăn ngo kố ƀă hdroâng kuăn ngo ki ê tung mâu hdroâng kuăn ngo; Hriâm tâp mâu troăng pêi ki tro, tung mê tơmiêt krê ki ôh tá tro ‘na kơdrâi kơnố hiăng châ xut tah lơ chôa ‘lâng troh tah’’.

Xông tơpui pơxiâm po Hôp tơpui tơno, jâ Nguyễn Thị Thu Hiền, Kăn phŏ hnê ngăn Khu xiâm pơkuâ vâi kơdrâi Việt Nam tối: Hôp tơpui tơno cho roh vâ tâi tâng kăn teăng mâ, mâu vâi o sinh viên, droh rơtăm tơpui tơno, tối ăm dêi pó túa ki rơkê tơtro, tơdrêng amê tơmâng, mơnhên mâu tơdroăng ki kal khât, ki kơnâ kum tung tơdroăng cheăng, ăm tơdroăng mơnhông dêi châ ƀă pói vâ veăng kum ăm pơlê pơla dêi rêm ngế.

Ƀă Khu xiâm pơkuâ Khu vâi kơdrâi Việt Nam ƀă mâu kơvâ ki tơdjâk, kố xuân cho roh vâ hvái ngăn nhên tâ mê nếo hnoăng dêi droh rơtăm, sinh viên tung veăng mơdêk tơdâng tơ’mô kơpong kuăn pơlê hdroâng kuăn ngo ƀă kong ngo, vâ ai mâu troăng pơkâ pêi, troăng hơlâ mơnhông tơdroăng veăng kum kal khât dêi khu kố. Tiô jâ Nguyễn Thị Thu Hiền, tơdroăng xut ta troăng tơmiêt krê ôh tá tro ‘na kơdrâi kơnốu kal ai tơdroăng tŏng, gum, pro tơ’lêi hlâu, ing hên khu kơvâ cheăng ki tơdjâk, mơdêk ƀă mơhnhôk ăm droh rơtăm pêi pro tơdroăng ki pói vâ dêi tơná.

‘’Cho pói vâ ‘nâng Khu xiâm pơkuâ hnê hriâm ƀă Hnê mơjiâng tuăn ngôa rơkê kô mơdêk mâu tơdroăng pơtâng tối, mơdêk hlê plĕng, tơkŭm po hên tơdroăng pêi pakong chô hriâm vâ hnê tơdroăng ki rơkê tro, troăng rêh ối ‘na tơdâng tơ’mô pơla kơdrâi kơnố ăm sinh viên, vâ khu kố kô cho khu ki djâ troăng ahdrối, prôk hdrối tung tơdroăng xut tah troăng tơmiêt krê ôh tá tro ‘na kơdrâi kơnố, pêi pro rơdêi tro tơdroăng tơdâng tơ’mô pơla kơdrâi ƀă kơnố’’./.

Hôp tơpui tơno ối tung tơdroăng pêi dêi Tơdroăng pêi tiô khôi vâi krâ nah mơhnhôk pêi pro rơdêi tro tơdroăng tơdâng tơ’mô pơla kơdrâi kơnố’’. Tơdroăng pêi châ tơkŭm po ối tung Tơdroăng tơkêa bro 8 ‘’Pêi pro tơdâng tơ’mô pơla kơdrâi   ƀă tơleăng mâu tơdroăng ki kal ƀă vâi kơdrâi ƀă kơnốu ƀă vâi hdrêng’’ ối tung Tơdroăng pơkâ xiâm tơnêi têa mơnhông cheăng kâ – rêh ối pơlê pơla kơpong kuăn pơlê hdroâng kuăn ngo ƀă kong ngo hneăng hơnăm 2021 – 2030. Mâu vâi o hok tro veăng tơdroăng kố cho mâu ngế djâ troăng ahdrối pơhlêh troăng tơmiêt krê ôh tá tro ‘na kơdrâi kơnố tung rơpŏng ƀă pơlê pơla, xut tah lôi mâu vêa vong ôh tá tơtro, cho tíu ki mơdât ăm tơdroăng mơnhông dêi châ ƀă pơlê pơla. Rêm ngế vâi o cho môi ngế pơtâng tối ki tro, ai hên troăng tơmiêt, troăng pêi rơkê, tơmiêt pêi rơkê tung pơtâng tối mơdêk hlê plĕng ‘na kơdrâi kơnố, tơdâng pơla kơdrâi ƀă kơnố troh pú hmâ, mâu nhŏng o tung rơpŏng ƀă rơxông vâi hdrêng...veăng kum mơdêk tâ mê nếo tơdroăng tơdâng tơ’mô a kơpong kuăn pơlê hdroâng kuăn ngo ƀă kong ngo./.