Ki nhên, hâi lơ 30/9, pôa Đinh Văn Thanh ối a pơlê kân Đak Pơ, drêng gu tơnêi vâ pro hngêi mê châ hlo hên tíu a hên kơxêng kuăn mơngế, ƀă mâu tơmeăm môi tiah mơđŏng, kơtong tâ liăn pro ƀă kéa, loăng chêh têa muk, chêng khŏng kơxu ƀă hên ‘mrâm pháu. Pôa Thanh hiăng tơbleăng tơdroăng ƀă kơ koan cheăng. Tơdah tơdroăng, Đô̆i K52 kong pơlê Gia Lai hiăng mơhnhôk kăn ƀô̆, mâu lêng rơtế mâu tơmeăm pêi pro ti tăng ƀă tơkŭm kơxêng a kơpong kố.

Tơdroăng pêi pro hnoăng cheăng, Đô̆i K52 mơnhên kơxô̆ kơxêng kiâ tiô riân dâng 32 ngế, châ tâp ôh tá tiô hdrối kơ’nâi ƀă ối pá pêng dêi pó. Nôkố khu lêng kong pơlê Gia Lai pơtối ti tăng vâ mơnhên, trâm mâ mâu ngế ki veăng tơplâ xâ a Đak Pơ vâ tơ’nôm tơdroăng vâ mơnhên. Tơdrêng amê, Đô̆i K52 kô po rơdâ kơpong ti tăng ƀă tơkŭm mơnhên inhên rêm râ tơnêi vâ mơnhên inhên rêm khu kơxêng kiâ.