Măng tĭng Tuá lĕm tro - Ôm hyô Gia Lai hơnăm 2023 po sap ing hâi lơ 11 troh lơ 18/11 ai dâng 1 rơpâu ngế vâi krâ - nhŏng o tung kong pơlê ƀă kong pơlê ki ê. Tung mê, ki hơniâp ro má môi cho Festival Mơđah tŏn Chêng koăng Gia Lai hơnăm 2023, tơkŭm hên mâu vâi krâ-nhŏng o dêi 17 tơring, pơlê kong krâm, pơlê kong kơdrâm tung lâp kong pơlê ƀă mâu kong pơlê kopong Tây Nguyên. Pơtối mê, cho mâu leh mơdĭng ki hơniâp ro, môi tiah leh mơdĭng reăng mâ hâi kong - ngo on Čư̆ Đăng Ya, tơring Čư̆ Pah; hneăng tơ’noăng vo plong loăng a kroăng Pô Cô, tơring Ia Grai.

Drêng kố, a pơlê kong kơdrâm xuân hiăng po mâu leh mơdĭng troăng kơphô̆; vêh mơnhên túa rêh kâ ối pơlê pơla, túa ki mơhno khôi hmâ lĕm tro; mơđah tơbleăng, mơhno mâu chêng koăng, prôa, rơvŏng hlŭm dêi Tây Nguyên.

Pơtối Măng tĭng túa lĕm tro-Ôm hyô kong pơlê Gia Lai, pơlê kong kơdrâm Plei Ku po Hâi Xah hêi - Ôm hyô hơnăm 2023 ƀă Pri tơ’noăng kơtâu Gia Lai City Trail-Tơdroăng póu hlo dêi kong kế ngo ngối kân krip. Tơmối ƀă kuăn pơlê châ ngăn mâu tơdroăng tŏn mơđah chêng koăng hơniâp ro, po pá ngiâ bo cheăng Biển Hồ. Pa kơdâm troăng loăng hngó ki ngiât rơngiâp lĕm, cho mơđah tơbleăng um Plei Ku Nah ƀă Nôkố, ai 100 kơtâ um tối ‘na kuăn mơngế, tơnêi tíu, tíu ki krip tơdrŏm lĕm, kơphô̆, túa lĕm tro, leh mơdĭng Plei Ku ing hơnăm 1975 tá troh nôkố.

Pôa Ngô Văn Hoà - Kăn pơkuâ ngăn Kâu lăk ƀô̆ Thái ƀă Hok tro, ngế ki xup um mê tối ăm ‘nâi:

“Mâu um ki hiăng xup chôu ‘măn ki á cho sap ing hơnăm 2008 troh nôkố. Um ki kố ôh tá hâi ai vâi ki lâi xup trối mê, la tung mâu măng internet pơrá hiăng châ hlo xua á tâ ‘măn. Á mơđah tơbleăng tơ’mô péa pâ, um ki pro tiô túa um mơđah ki ton ƀă chal nếo nôkố vâ vâi ki ngăn pơchông ngăn. Xuân ai mâu ‘nâ tối, tơnêi tíu kong kế hdrối nah ga lĕm, ai ngế ‘nâ tối Plei Ku nôkố ga kro mơdrŏng, kân krip. Á rơhêng vâ vâi krâ-nhŏng o a Plei Ku vêh ngăn um ton nah; khu vâi rơxông nếo châ hlo pơlê kong kơdrâm Plei Ku châ mơnhông tiah nôkố cho kơnôm ing ivá cheăng dêi hên khu rơxông, ing pâ pôa ƀă tâi tâng kuăn pơlê mâu hdroâng kuăn ngo tung kong pơlê”.

Ai môi tơdroăng ki hơniâp ro dêi Hâi mơdĭng Ôm hyô hơnăm 2023 roh kố mê cho kơtâu “Gia Lai City Trail - Tơdroăng póu hlo dêi kong kế kân rơdâ” tâi tâng ai 4 rơpâu ngế veăng kơtâu. Troăng ki kơtâu mê ai tíu ‘nâ dâng 5km, 10km, kơtâu marathon 21km ƀă troăng kơtâu hơngế, cho full marathon (42km) pơrá kơtâu ing apoăng a tíu ki krip lĕm Biển Hồ, tơkâ luâ mâu kơdrum chế ƀă kơdrum loăng hngó ngiât lối hrĭng hơnăm, tơkâ luâ Hngêi Chuô roh ton nah Bửu Minh troh a ngo on Čư̆ Đăng Ya ki trĭng tơ-eăng lĕm dêi reăng mâ hâi kong a tơring Čư̆ Păh.

Troăng prôk kố cho ing hên mâu troăng hơlâ dêi kơphô̆, troăng klông, inúa ngo, tro klăng a rơnó ki lĕm má môi dêi kong tơbăng Gia Lai. Jâ Nguyễn Thị Hậu Hiền hiăng vâ chê 70 hơnăm rơtế prôk ƀă dêi rơpŏng ing Hà Nội mot a pơlê kong kơdrâm Plei Ku ôm hyô ƀă veăng tơ’noăng kơtâu, hâk ro tối tiah kố:

“Ngo on ƀă reăng mâ hâi kong, tơnêi tíu kong kế akố krip lĕm; ai loăng hngó tiah kố mê hyôh kong prâi krúa lĕm. Kuăn mơngế Plei Ku xuân têm rơpiât. Inâi dêi Pri ki tơ’noăng mê cho “Tơdroăng póu hlo dêi kong kế kân rơdâ”, kố châ ngăn cho tơdroăng póu dêi á hiăng ing hên hơnăm kố. Nôkố châ veăng tơ’noăng kơtâu akố ƀă tơnêi tíu, kong kế ki lĕm krip rơtế ƀă rơpŏng hngêi, á tâ hơniâp ro khât”.

Tiô Khu ki chêm điêm tối, cho pri tơ’noăng kơtâu Trail - kơtâu prôk drô troăng kơphô̆ xuân kơtâu hếo troh a inúa ngo, mâu tíu pơrá phá dêi pó cho roh ki apoăng châ tơkŭm po a Gia Lai, pro hơnăm kố hiăng mơjiâng môi ivá ki kân ƀă pơlê pơla ki kơtâu tung lâp tơnêi têa. Tung mâu ngế ki tơ’noăng kơtâu roh kố ai hên ngế châ kâ pri ki kân tung lâp tơnêi têa, ƀă hiăng tơ’noăng châ kâ pri kân a mâu kong têa vâi ê. Pri ki kố hiăng châ ai tơdroăng tŏng kum, veăng tŏng dêi 35 tíu pêi cheăng, khu mơdró kâ ai lối 1 rơtal liăn mâ ƀă hên mâu tơmeăm ki ê, pơrá phá dêi pó.

Pakĭng mâu tơdroăng ki tơkŭm po, môi iâ kơxô̆ liăn ki mê kô châ xúa ăm tơdroăng cheăng kâ, rêh ối a pơlê kong kơdrâm Plei Ku ƀă tơdroăng tŏng kum ăm Kơxô̆ liăn “Ếo hơtô ăm o”.

Pôa Nguyễn Xuân Hà - Kăn ƀơrô mơhno túa lĕm tro dêi pơlê kong kodrâm Plei Ku, kong pơlê Gia Lai tối ăm ‘nâi: ƀă ai hên mâu tơdroăng túa lĕm tro, tơ’noăng ôm hyô, ngê̆ thuât ki lĕm ro, Hâi mơdĭng Ôm hyô hơnăm 2023 dêi Pơlê kong kơdrâm Plei Ku hiăng vêh pơtroh ăm mâu tơdroăng ki hơniâp ro ăm kuăn pơlê ƀă tơmối. Kố xuân cho roh ki vâ kong pơlê mơhno tơbleăng um méa kuăn mơngế ki têm rơpiât, nhâ loăng, kong kế ƀă túa lĕm tro dêi Plei Ku.

“Mâu hâi hdrối mê hía nah, mâu kơ koan; tíu pêi cheăng, mâu cheăm, bêng, mâu ngế ki rơkê hiăng kơhnâ khât tung pơtâp, pói rơhêng vâ pleăng dêi hnoăng cheăng ăm tơmối ƀă mâu hneăng mơhnhôk mâu kơpong vêh tơkŭm akố châ hlo, châ ‘nâi túa lĕm tro ƀă tơdroăng hlế rơkê kơ tơmối dêi kuăn pơlê a Plei Ku vâ mơhno tơbleăng dêi mâu ngế ki têm rơpiêt, kong kế, ƀă túa lĕm tro dêi Plei Ku. Ing mê, pơlê kong kơdrâm Plei Ku pói rơhêng vâ pơtroh tối tơdroăng Pơlê kong kơdrâm ki têm rơpiêt ki hlế rơkê ƀă cho kơpong tơnêi ki ngiât lĕm xua vâ rak vế ivá châ chăn”.

Hâi mơdĭng Ôm hyô pơlê kong kơdrâm Plei Ku hơnăm 2023 po sap ing hâi lơ 17-19/11 a Kơpong Ôm hyô krip tơdrŏm Biển Hồ, cheăm Biển Hồ (pơlê kong kơdrâm Plei Ku). Troh a hâi mơdĭng mê, tơmối ing hên tíu châ ngăn, châ hlo tơdroăng ki hơniâp ro, túa lĕm tro dêi mâu hdroâng kuăn ngo ing mâu tơdroăng mơđah tŏn chêng koăng, vêh po khôi túa lĕm tro dêi hdroâng kuăn ngo ki iâ mơngế, tơbleăng mơhno mâu um túa lĕm tro dêi Plei Ku Nah ƀă Nốkố, um ôm hyô Plei Ku ƀă hên hĕng mâu tơdroăng ki ê.

Pakĭng mê, veăng xah ôm hêi mâu tơdroăng ki po mơdĭng, tơmối ối châ kâ mơnúa ngăn mâu kế kâ dêi Gia Lai, mâu tơmeăm ki châ dó inâi OCOP. Ƀă mâu tơdroăng ki po túa lĕm tro - ôm hyô pơtối châ po tung khế 11/2023 hiăng mơhno tối ‘na túa lĕm tro ki gok gâ, lĕm krip dêi mâu hdroâng kuăn ngo. Tơdrêng amê, tối tơbleăng tơdroăng ki ôm hyô ki hơniâp ro dêi kong pơlê Gia Lai.