VOV4.Xơ Đăng - Troh nôkố, kơvâ ngăn pơkeăng ƀă khăm pơlât kong pơlê Gia Lai hiăng hbrâ mâu tơmeăm vâ pâk vaccine COVID-19 ăm vâi hdrêng sap ing 5 troh pá kơdâm 12 hơnăm. Pôa Nguyễn Đình Tuấn – Kăn phŏ pơkuâ ngăn pơkeăng ƀă khăm pơlât kong pơlê Gia Lai tối ăm ‘nâi: nôkố, a kong pơlê Gia Lai ai lối 212 rơpâu ngế vâi hdrêng sap ing 5 troh pá kơdâm 12 hơnăm.

Vâ hbrâ mâu tơmeăm vâ pâk vaccine COVID-19 ăm vâi hdrêng hơnăm kố, tung pơla kố nah, Khu pơkuâ ngăn pơkeăng ƀă khăm pơlât kong pơlê Gia Lai hiăng pơcháu Tíu xiâm mơdât pơreăng pêi pro hnê mơhno ăm kăn ƀô̆ khăm pơlât a hngêi pơkeăng ‘na tơdroăng rah khăm, pâk ƀă pơlât klêi kơ’nâi pâk; hnê mơhno mâu ƀok thái pơkeăng, chêh ‘mot inâi, tơniăn a tíu pâk. Tiô tối hdrối, tơdroăng pâk kô châ tơkŭm po a mâu hngêi trung hriâm ƀă mâu hngêi pơkeăng klêi kơ’nâi Khu xiâm pơkuâ ngăn pơkeăng ƀă khăm pơlât xing xoăng vaccine vâi hdrêng sap ing 5 troh pá kơdâm 12 hơnăm, kô châ pâk vaccine drêng ai tơdroăng ki veăng dêi nôu pâ hok tro, lơ mơngế ki ai hnoăng ngăn.

A Sa Ly tơplôu [ă tơbleăng