VOV4.Xơ Đăng - Bú ối pa 1 khế nếo kô troh hneăng tơ’noăng râ má pái phôh thong tơnêi têa hơnăm 2022. Kơvâ ngăn hnê hriâm kong pơlê Gia Lai dế mơ-eăm mơdêk séa ngăn, tí tăng ngăn, kring vế tơniăn rôh tơ’noăng râ má pái phôh thong tơnêi têa hơnăm 2022 châ po tơniăn, krâu khât. Veăng tơ’noăng râ má pái tơnêi têa hơnăm kố, lâp tung kong pơlê Gia Lai ai lối 14 rơpâu 100 ngế chêh inâi tơ’noăng; tung mê ai vâ chê 13 rơpâu ngế hok tro râ phôh thong, 384 ngế hok tro hriâm yăo dục thường xuyên, ki u ối hok tro ki ôh tá plah tơ’noăng a mâu hơnăm hdrối mê hía nah.

Hriâm rơbot ƀai vâ hbrâ rôh tơ’noăng râ má pái phôh thong tơnêi têa a la ngiâ

Tung kơxô̆ hok tro chêh inâi tơ’noăng ai lối 13 rơpâu ngế chêh inâi séa ngăn vâ to râ đăi hok, kao đẳng. Ing kơxô̆ mâu hok tro tơ’noăng, kong pơlê Gia Lai hiăng chêh pơkâ ƀă 40 tíu tơ’noăng khât (tâk 1 veăng tơ’noăng tâng vâ pơchông ƀă  hơnăm 2021) ai 623 veăng tơ’noăng, mơhnhôk 2.400 ngế kăn bô̆, thái cô, mâu ngế cheăng veăng ngăn a khu Hô̆i đong tơ’noăng. Nôkố,  Khu xiâm ngăn hnê hriâm ƀă hnê mơjiâng tuăn ngôa rơkê kong pơlê hiăng hnê tối ăm mâu hngêi trung pê klêi tơdroăng hriâm yăo dục phôh thong tro tiô pơkâ.Tơdrêng amê, mâu hngêi trung klâ xoăng tiô mâu hok tro vâ ai mâu tơdroăng ăm rơbot bai châ tơ-brê, kum mâu vâi o hok tro khên tơnôu hdrối vâ mot tung veăng tơ’noăng.

Gương tơplôu ƀă tơbleăng