Dâng 1 khế kố, rêm kơmăng, plong pơto prêi rơtế kơmăi hrik prêi pơtối chuât tung kơpong long têa hngêi kơmăi on tơhrik Ia Ly. Hên kơmăi ‘véa, rơxế ƀen mot lo pơto prêi pêi cheăng ôh tá pơtê môi tiah tíu pêi cheăng kân kŏng trương. Klêi kơ’nâi hên hâi séa ngăn, ngin châ hlo rêm kơmăng ai lối 10 toăng plong ki kân, kŭn teăng dêi pó pơto prêi lo a tíu ‘măn tơkŭm. Mâu tuk ki ‘nâ hrik prêi tơdrêng tâ tung rơxế ƀen ƀă pơto tơdrêng mê lăm a tíu ki ê vâ tê.

“Tíu ki hrik prêi kố cho pêi hiăng ton, chôu kố (kơmăng) nếo hrik prêi mê peăng kong hâi vâi ôh tá hrik ôh, kơhâi tot a plông tíu ‘măn prếi tá. Klêi hrik prêi mê cho kơtâu troh a kĭng peăng kố hrik tâ tung rơxế, ôh tá ai tíu ki chôu ‘măn klâi ôh, môi toăng tuk cho 1 toăng rơxế tê, hâi ki lâi xuân tiah mê’’.

Pôa Lê Xuân Dũng, Kăn pơkuâ ƀơrô rak ngăn loăng pơlái kong kế ƀă kong prâi tơring Chư Păh tối ăm ‘nâi, nôkố tung tơring ai 10 tíu, ƀă 10 khu tê mơdró, kŏng ti châ ăm phêp hrik xo prêi, tung mê ai 4 tíu châ ăm phêp hrik xo prêi, a mâu cheăm Hà Tây, Ia Khươl, Ia Nhin ƀă Ia Ka. Sap apoăng hơnăm 2023, Vi ƀan tơring Chư Păh hiăng mơjiâng môi tôh pêi cheăng vâ lăm séa ngăn, tơmâng xo tơdroăng, tơdroăng tối tơbleăng ‘na tơdroăng hrik xo prêi ôh tá tro luât. Laga, a drêng séa ngăn pơrá ôh tá châ hlo ki klâi ôh.

“Hrik xo prêi a kơpong long têa hngêi kơmăi on tơhrik Ia Ly troh nôkố tá hâi ai tíu cheăng ki lâi chiâng vâ hrik xo prêi tiô pơkâ dêi luât. Kăn pơkuâ Vi ƀan tơring, Kŏng an, Khu ngăn rak vế loăng pơlái kong kế hiăng lăm séa ngăn a long têa, laga drêng séa ngăn xuân tá tá hâi hlo ki klâi. Kơpong long têa cho kân rơdâ, tơkăng pơla kong pơlê Gia Lai ƀă Kon Tum laga drêng châ hlo mê mâu ngế ki kố pơrá hbrâ hdrối tâi tâng mâu tơdroăng, vâ châ rup tơdrêng cho pá ‘nâng, mâu ngế ki kố hmâ hrik xo prêi a chôu ki pơtê pêi cheăng, chôu pakong chôu pêi cheăng, a kơmăng, drêng kong hiăng măng’’.

Tiô tơbleăng dêi Vi ƀan tơring Chư Păh, nôkố a kơpong long têa hngêi kơmăi on tơhrik Ia Ly ai 4 ngế dế pêi pro mâu tơdroăng tơdjâk troh hrik xo prêi. Pakĭng 1 tíu tơkŭm tơtro luât mê ối ai 3 tíu tơkŭm dêi mâu tíu cheăng ki ê vâi tối dêi kui tah trâp tung long têa. Mơhé tá hâi châ tê, pơto tơmeăm tung kơdâm têa laga tơdroăng hrik, pơto hiăng ai tung môi pơla ton tĭn. Pôa Nay Kiên, Kăn hnê ngăn Vi ƀan tơring Chư Păh tối ăm ‘nâi, tơdroăng tơkŭm, pơto ôh tá tro luât hmâ ai a kơmăng xua mê pro hên pá puât ăm khu cheăng.

“Tơdroăng kố ai kơtăn lối vâ châ 1 khế, ƀă mâu mơ-éa phêp pêi cheăng cho mơ-éa phêp kui tah trâp long têa dêi Khu xiâm pơkuâ Kơmăi kơmok tê mơdró ăm tung long têa. ‘Na pơkâ mê mâu tíu cheăng kố cho tá hâi châ pơto lo pakong. Laga tung kong măng lơ drêng khu cheăng ôh tá lăm séa ngăn mê vâi hiăng pơto. Laga ngin kô mơjiâng khu séa ngăn 4 ngế a kơpong kố. Ki lâi ối tung hnoăng dêi tơring mê ngin kô pơxâu phâk kơtăng, ki lâi hnoăng dêi kong pơlê, lơ kong pơlê pú hmâ mê ngin pơkâ ƀă kong pơlê ai rơkong tơpui ƀă kong pơlê Kon Tum vâ tơleăng tiô pơkâ’’.

Hên rơxế pơto prêi hiăng djâ prêi lo a long têa hngêi kơmăi on tơhrik Ialy ôh tá bê xâu vâi ki ê. Tơdroăng pro pơhôi, ôh tá pôu râng hnoăng cheăng tung pơkuâ a kố dế pro châ lo pakong hên tơmeăm tung kơdâm tơnêi dêi tơring ƀă pro tơdjâk hên ‘na gâk kring tơniăn.

Hrĭng met khô̆i prêi châ pro pơxúa krê pơto tê rêm hâi ôh tá xê to pro châ hlo pakong tơmeăm, tơdjâk troh pêi lo liăn dêi tơring. Pôa Đoàn Tiến Cường – Kăn pơkuâ Kŏng ti on tơhrik Ialy (ối tung Grup pơuâ on tơhrik Việt Nam) tối ăm ‘nâi, tơdroăng hrik xo prêi ôh tá tro luât ai a kơpong long têa hngêi kơmăi on tơhrik tá hâi tơdjâk troh ki dâi lĕm, tơniăn tơmeăm long têa, rơchôa têa.

Tung kơpong kơtăn dâng 300 met kơtăn chêng rơchôa long, mâu ngế pêi cheăng on tơhrik pơkuâ, troh drêng ai mâu plong hrik xo prêi troh a kố. Ƀă pakong kơpong tối kơpêng mê kơpong long rơchôa têa mê chiu tơdroăng pơkuâ, séa ngăn dêi tơring Chư Păh, Khu pơkuâ loăng pơlái ƀă kong prâi, Kan sát rak ngăn kong prâi. Mơhé tơdroăng hrik xo prêi ôh tá tro luât tá hâi tơdjâk troh tơniăn dêi long rơchôa têa, laga tơdroăng kố kal châ tơleăng kơtăng, vâ gâk kring kế tơmeăm khoăng tung kơdâm tơnêi, kong kế a long têa ƀă tơniăn tơdâng kong prâi.