VOV4.Xơ Đăng - Drêng yă têa châu têa kơxăng tâk đi đo, yă rơxế pơto tơmeăm dêi hên khu tê mơdró a Gia Lai dế châ pơ’lêh ăm tơtro ƀă tơdroăng tơdjuôm.

Pôa Châu Văn Liên (tôh 2, bêng Hội Phú, pơlê kong kơdrâm Plei Ku) rôe môi vĕ rơxế dêi rơxế hngêi Thuận Tiến kơtâu ing pơlê kong kơdrâm Plei Ku troh Pơlê kong kân Hồ Chí Minh ƀă yă 350 rơpâu liăn. Pôa Liên tối ăm ‘nâi, tâng vâ pơchông ƀă kơto rơxế dêi 4 khế hdrối pôa to, yă vĕ rơxế hiăng to 50 rơpâu liăn. Yă vĕ rơxế to tơdjâk troh tơdroăng ki pơxúa dêi mơngế ki to, la rêm ngế xuân ôh tá ‘nhó châ xúa, xua yă têa châu pơtối to kơnâ  pro mâu khu rơxế chơ tơmối trâm hên xơpá. Tơmối ki to rơxế Châu Văn Liên ai tối:

‘’Hdrối nah a to, yă têa kơxăng bú lối 20 rơpâu liăn 1 lit, nôkố yă têa kơxăng tơnêi  hiăng to vâ chê 34 rơpâu liăn. Khu mơdró vâi mơdró kâ thế ai rơkâ yoh. Pơla hdrối kố nah xua ai pơreăng kân mâu khu mơdró ‘na rơxế chơ tơmối xuân xuân trâm pá há, tiô yă têa kơxăng ki khu mơdró pro to yă mê a cho ngế kuăn pơlê a hlo xuân tro há vâi pro to ti mê’’.

Kŏng ti chơ tơmeăm tơmối dêi Thuận Tiến pơkâ yă nếo klêi hiăng ai hlá mơ-éa pơkâ ‘mâi hơ’lêh yă

Tối ‘na tơdroăng ‘mâi hơ’lêh yă vĕ, pôa Nguyễn Hồng - Ngế pơkuâ Kŏng ti pêi cheăng tiô rơnó chơ tơmối Hồng Hải ăm ‘nâi:  Klêi kơ’nâi ton khế hơnăm pơtê a mâu troăng ki ‘nâ xua pơreăng COVID-19, Khu mơdró vâ ‘nâng ối râk ti mê kơlo yă vĕ vâ châ chơ hên tơmối. Laga, klêi kơ’nâi hiăng tâi pơreăng mê yă têa kơxăng to kơnâ nếo pro kơxô̆ liăn rêm rôh rơxế kơtâu mê khŏm thế pro to yă vế.

‘’Ing kố prôk troh Pơlê kong kân Hồ Chí Minh kơtâu tâi 400lit têa kơxăng, hdrối nah tơbleăng yă ngin ai 300 rơpâu liăn 1 vế la nôkố yă têa châu to troh 31 rơpâu liăn hên tâ luâ péa hdroh, vé bú to tơ’nôm 50 rơpâu liăn tê 1 vĕ xua tơdroăng xơpá tơchoâm. 400 lit têa châu dêi môi hdrôh rơxế kơtâu  tâi 12 rơtuh liăn, liăn ki u ối cho liăn ‘nâp kơtâu troăng prôk BOT, liăn khế dêi ngế vế rơxế, liăn nâp xua kơtâu luâ kông pá kô pá tá, nôkố xua tơdroăng pá tơchoâm gá tiah mê thế rơtế [ă dêi rơpó tung tơdroăng trâm xơpá’’.

Hên khu mơdró rơxế kơtâu chơ tơmối thế pro to yă vĕ xua têa châu têa kơxăng pơtối to kơnâ

Xuân tơdjâk troh tơdroăng ‘mâi hơ’lêh yă vĕ jâ Trần Thị Ánh, Ngế phŏ pơkuâ Kŏng ti pêi cheăng tiô rơnó Mai Linh - Gia Lai tối: Tơdroăng ‘mâi pro to kơnâ yă rơxế cho tơdroăng ki xơpá tơchoâm pin ôh tá ‘nâi hdrối  ƀă mâu khu mơdró rơxế kơtâu chơ tơmối drêng yă têa kơxăng to kơnâ. Laga, tíu pêi cheăng xuân tơbleăng kơlo ‘mâi hơ’lêh to yă ăm tơtro há, vâ tơniăn ki pơxúa dêi tơmối ƀă khu mơdró.

‘’Hlo yă têa châu têa kơxăng to kơnâ tiah mê khŏm thế tíu pêi cheăng ‘mâi hơ’lêh yă to vâ ăm tơ-tro ƀă tơdroăng ki ai khât. Tíu pêi cheăng pro to yă ki achê kố a hâi lơ 20/6 ki to gá tâng riân dâng 6% vâ pơchông ƀă hdrối nah. Tơdroăng mê nếo klêi kơ’nâi tâi pơreăng cho pá, tung pơla yă têa châu, têa kơxăng to kơnâ tiah mê khŏm thế mâu khu mơdró pro yă to há, yă to la ai mâu tơdroăng tơchĕng tơmiât pá há dêi Khu mơdró, la vâ rêh thế pro tiô pơkâ kơlo gá há’’.  

Sap apoăng hơnăm troh nôkố, yă têa kơxăng tung tơnêi têa hiăng to 12 hdrôh, 3 hdrôh chu kơdroh bă dế ‘’to a kơlo ki kơnâ’’,  ‘na yă riân sap ing nah ta troh nôkố. Vâ pơtối rak vế tơdroăng cheăng, 25 khu mơdró chơ tơmối ki kơtâu troh mâu kong pơlê ki ê, khu mơdró kơtâu rơxế taxi tung kong pơlê Gia Lai hiăng pro yă vĕ to há yă apoăng. Kơlo ‘mâi hơ’lêh to yă vĕ dêi mâu khu mơdró kơtâu chơ tơmối mê tâng riân 15%.

Tiô Khu xiâm ngăn troăng prôk-rơxế kơtâu kong pơlê Gia Lai, tíu pêi cheăng hiăng xo hlá mơ-éa pơtroh ai chêh tơdroăng ‘mâi hơ’lêh pro to yă vĕ dêi tâi tâng mâu khu mơdró chơ tơmối tung kong pơlê. Klêi xo hlá mơ-éa, Khu xiâm hiăng pơkâ thế mâu tíu pêi cheăng pro ti mê ƀă xo tro yă vĕ chêh tung hlá mơ-éa, tơdroăng ‘mâi hơ’lêh to yă vĕ thế tơtro ƀă kơlo ki to dêi têa châu…

Pôa Nguyễn Bá Minh, Ngế phĕ bơrô pơkuâ ‘na Ƀơrô  Pơkâ – Liăn ngân - ‘Na chơ tơmối – Khu xiâm ngăn troăng prôk rơxế kơtâu kong pơlê Gia Lai ăm ‘nâi:     

‘’Drêng xo mâu hồ sơ chêh tơbleăng dêi mâu tíu pêi cheăng mê ngin xuân hiăng pơkâ thế mâu tíu pêi cheăng pêi pro tro tơdroăng, xo liăn tro tiô yă hiăng chêh tung hlá mơ-éa pơkâ. Pakĭng mê, hnê mơhno ăm mâu tơraih rơxế, mâu khu râ pơkuâ cheăng mơdêk hnoăng cheăng séa ngăn tơdroăng chêh tung hlá mơ-éa ‘na xo liăn yă chơ tơmối dêi mâu tíu pêi cheăng vâ rak tơniăn pêi pro tro tiô pơkâ dêi luât tơnêi têa’’.

Hoàng Qui chêh

Gương tơplôu tơbleăng