Hâi lơ 22/11, Ƀơrô Kan sát séa ngăn troăng klông ƀă rơxế kơtâu – Kŏng an kong pơlê Gia Lai hiăng tơrŭm ƀă Hngêi kơmăi sik An Khê tơkŭm po. Hneăng hôp mơhnhôk pêi pro ƀă kĭ tơkêa pêi tiô luât rak tơniăn pơlê pơla, tơniăn troăng klông ƀă rơxế kơtâu ƀă Hngêi kơmăi Sik An Khê, ngế krê tê mơdró pơto tơmeăm rơnó ko kơtếo 2023 – 2024. A leh kĭ tơkêa, peăng Hngêi kơmăi Sik An Khê, mâu khu tê mơdró, khu tơrŭm cheăng pơto tơmeăm hiăng rơtế kĭ pơkâ tơrŭm pêi pro kơtăng mâu pơkâ ‘na pơto tơmeăm ƀă rak tơniăn troăng klông, xui tơmeăm ‘măn tung rơxế ƀă pơto ôh tá hngăm hluâ pơkâ; rơxế kơtâu drô troăng kân thế tơniăn tŭm pơkâ.

A hneăng hôp, ngế vê rơxế Nguyễn Tấn Chung, cheăm Nghĩa An, tơring Kƀang tối, roh mơdiê kơtếo kố, Hngêi kơmăi sik An Khê xing xoăng phĭu rôe kơtếo tơtro, kum ăm tơdroăng ko kơtếo dêi kuăn pơlê tơniăn. Ing mê, ví tơdroăng rơlối, lơ ôh tá tŭm rơxế pơto, pro tơdroăng pơto tơkŭm hên, pơto lối hngăm tiô pơkâ.