VOV4.Xơ Đăng - Hâi lơ 17/5, Khu râng liăn Hbrâ mơdât hlâ rong châu Á (AIP) tơrŭm ƀă Khu rak tơniăn troăng prôk kong pơlê Gia Lai tơkŭm po Tơdroăng mơnhên tối klêi kơ’nâi hneăng má 2 dêi tơdroăng tơkêa “Kơdroh kơtâu rơxế têi – Hngêi trung hriâm tơniăn” a pơlê kong kơdrâm Plei Ku. Tơdroăng kố châ tơbleăng pro a pơlê kong kơdrâm Plei Ku, kong pơlê Gia Lai sap ing khế 7/2020 nah troh nôkố.

Péa Hngêi trung râ má môi Chu Văn An (Pơlê kong kơdrâm Plei Ku)

Tiô mơnhên tối dêi pôa Lê Văn Hạnh, kăn phŏ pơkuâ Khu ngăn troăng prôk ƀă chơ kế tơmeăm, kăn phŏ khu rak ngăn tơniăn troăng prôk kong pơlê Gia Lai, mâu hngêi trung hriâm râ má môi a Pơlê kong kơdrâm Plei Ku hiăng rak tơniăn tơdroăng pơkâ ‘na túa pơkâ kơpong hngêi trung hriâm tơniăn. Tiah mê, a kơpong bo cheăng kơxô̆ 29 hngêi trung râ má môi a Pơlê kong kơdrâm Plei Ku, tíu pêi cheăng tơbleăng tơdroăng tơkêa hiăng ‘mâi rơnêu, po rơdâ, pro nếo lối 800 met karê troăng ƀê tong chhá kơxu, ƀê tong; pro lối 2 rơpâu met karê kĭng troăng; châ 136 to kơ-ƀeăng tơbleăng troăng prôk a kơpong bo cheăng hngêi trung; ‘mot tơ’nôm kế ki vê tơdrăng a troăng, ki pro kơdroh ki kơto têi ƀă hên ki ê.

Ƀă tơdroăng mê cho vâ mơdêk hlê plĕng pơlê pơla ƀă tơrŭm ƀă khu kăn sat gak ngăn troăng prôk Pơlê kong kơdrâm Plei Ku, séa ngăn, pơxâu phâk mâu ngế pro xôi nếo ‘na ki kơto têi a kơpong hngêi trung hriâm.

Katarina Nga tơplôu ƀă tơbleăng