Sap hơnăm 2016 troh nôkố, kong pơlê Gia Lai ai 257 tơdroăng tơkêa bro châ ăm hlá mơ-éa mơnhên chêh inâi, vâ pêi pro tiô troăng ‘no liăn cheăng, ƀă kơxô̆ liăn lối 78 rơpâu rơtal liăn. Mâu tơdroăng tơkêa pro tơkŭm pêi hên ‘na kơvâ cheăng cho pêi chiâk deăng pêt loăng, on tơhrik, kơmăi kơmok, mơjiâng hngêi trăng troăng prôk, chiâ xo tơmeăm khoăng tung kơdâm tơnêi.

La ki khât, bú ai 163 tơdroăng tơkêa bro hiăng châ pêi cheăng. 72 tơdroăng tơkêa bro hâi châ tơbleăng. Tơdroăng ‘no liăn cheăng hâi châ tơ’mot hên khu mơdró ăm hlo nhên ing kơlo xô̆ ivá tơbriât cheăng râ kong pơlê PCI hơnăm 2022 kô nah. Gia Lai bú ối má 45/63 to kong pơlê pơlê kong kân (kơdroh 19 râ tâng pơchông ƀă hơnăm 2021);  ối má 4/5 to kong pơlê  kơpong Tây Nguyên. Vâ ‘mâi hơ’lêh tơdroăng ‘no liăn cheăng, khế 9/2023, Vi ƀan kong pơlê Gia Lai hiăng pơkâ ‘mâi mơnhông vâ tơkâ luâ xơpá, mơdêk kơlo xô̆ ivá tơbriât cheăng kong pơlê hơnăm 2023 ƀă mâu hơnăm pơtối. Pơkâ mơ-eăm mơdêk râ kơlo kơxô̆ PCI kong pơlê hơnăm 2023 tung khu 20 to kong pơlê, chiâng rôh ki hên má môi.