Klêi kơ’nâi 1 hơnăm bro, La Tơdroăng tơkêa bro troăng prôk Nguyễn Chí Thanh, troăng ki prôk sap ing troăng Trường Chinh troh troăng Lê Duẩn, pơlê kong kơdrâm Plei Ku, nếo klêi ‘no liăn châ 1,5 rơtal tung tâi tâng kơxô̆ liăn châ xoăng 185 rơtal, châ 3,6%. Xuân a Plei Ku, Tơdroăng tơkêa bro troăng Nguyễn Văn Linh, nếo ‘no liăn châ vâ chê 27% tung tâi tâng kơxô̆ liăn 100 rơtal dêi hơnăm. Ƀă tơdroăng bro troăng ví ‘na tơdroăng cheăng kâ peăng mâ hâi Lo (troăng ví kơxô̆ 19) tơdroăng tơkêa ki kal dêi kong pơlê, ai kơxô̆ liăn 1.200 rơtal, xuân nếo bu châ 3,6%.

Tá 3 tơdroăng tơkêa kố pơrá hrá, xua rơtế 1 tơdroăng mê cho tá hâi kêi gu tơnêi, ‘nhiê mâu hdrê loăng pêt, tá hâi pơcháu tơnêi ăm tíu ki bro. Pôa Phan Việt Tân – Kăn phŏ ngăn ƀơrô cheăng pơkuâ ngăn tơdroăng tơkêa pêi chiâk deăng, ối tung Khu pơkuâ ngăn ‘no liăn Mơjiâng bro kế tơmeăm kong pơlê Gia Lai, ăm ‘nâi, tiô pơkâ dêi Luât ‘no liăn cheăng tơdjuôm, tơdroăng pơkâ mơnhên tơnêi vâ pơcháu tơnêi kal hên tơdroăng, mê chiâng tơdjâk troh tơdroăng ki hrá ‘no liăn:

 “Nôkố xuân dế tơkôm pơcháu tơnêi. Ki hên mâu cheăm tơring môi tiah tơring (Đăk Đoa prế pơlê kong kơdrâm Plei Ku) pơrá hiăng klêi hnoăng cheăng riân ngăn tung tơdroăng ki tơdjâk dêi tơdroăng tơkêa. La nôkố, dế tơvâ a tơdroăng mơnhên yă tơnêi, mê athế kơnôm tíu pêi cheăng tiâ mơnhên, vâ Khu ngăn kế tơmeăm tung têa a tơnêi ƀă hyôh kong prâi kĭ. Klêi kơ’nâi tíu pêi cheăng bro klêi, mê mơni kô ‘no tơ’nôm liăn. La troh nôkố ôh ti châ tiô pơkâ mơ’no”.

Pakĭng tơdroăng ki tối xua tơvâ ‘na pơcháu tơnêi, mê tơdroăng ki ôh tá bê tơnêi vâ ok xuân bro ăm tơdroăng tơkêa a Gia Lai hrá kâi kêi. Ki khât, a kong pơlê Gia Lai ai 4 tíu ki ai tơnêi vâ ok kơđu châ hbru ăm kui xo bă 5 tíu ki ai hmốu châ ăm phêp xo hmốu, prêi,  tơnêi. La ki hên mâu tíu ki kố pơrá ối kơtăn hngế ing mâu tíu ki kal vâ xo tơnêi ki tâp lơđu hên.

Tung hên khế hdrối, kong pơlê Gia Lai hiăng ăm tê tơbriât, kĭ, pro hlá mơ-éa hbru ăm phêp mâu tíu ki ai tơnêi, ai hmốu vâ kum ăm tơdroăng tơkêa, la troh nôkố tơdroăng kố xuân tá hâi châ kum klêi. Pôa Nguyễn Văn Quảng – Teăng mâ tíu pêi cheăng bro troăng Kŏng ti Tơlo liăn mơjiâng bro troăng 510 pơkuâ tíu bro kơxô̆ 7, Tơdroăng tơkêa Troăng ví cheăng kâ peăng mâ hâi Lo tối ki xơpá dêi tíu bro:

“Tíu ki bro kơxô̆ 7 ai 3 to kông ƀă 1,5 km troăng. Troh nôkố nếo châ 1 to kông M2 a Biển Hồ cho tơbleăng châ bro. Tung 1,7km troăng, mê ngế ki ‘no liăn bro nếo pơcháu 500m troăng, ngế ki xo bro xuân dế tơbleăng, la tá hâi ai tơnêi vâ ok. Rơhêng vâ rĕng bro mê ki kal má môi cho ai tơnêi ok”.

Tơdroăng ki pá a Gia Lai cho tá mâu tơdroăng tơkêa rak tơniăn ki bro, xuân trâm pá tung ‘no liăn, xua kong pơlê ôh tá bê liăn! Kố ki khât a mâu tơdroăng tơkêa bro troăng xúa kơxô̆ liăn sap ing liăn xúa tơnêi ƀă ăm mung tơnêi, drêng 2022 troh nôkố, tơdroăng ki tê roê hngêi trăng tơnêi tơníu pơtê, kong pơlê kơdroh mâu kơxô̆ liăn nâp.

Pôa Trương Hải Long – Kăn hnê ngăn Vi ƀan kong pơlê Gia Lai ăm ‘nâi, mâu khu râ, kơvâ cheăng, mâu cheăm, tơring tung kong pơlê dế tơbleăng tăng troăng vâ tŏng kum xơpá:

 “Khu ngăn pơkâ ƀă ‘no liăn cheăng cho kơ koan ki xiâm ăm 3 tôh pêi cheăng rĕng pơtroh ăm khu ki ai hnoăng xoăng mâu kơxô̆ liăn ki u ối; pêi klêi mâu hlá mơ-éa ‘no liăn, mơdêk rĕng tơdroăng ki pơcháu tơnêi ƀă bro tíu rêh ối. Khu ngăn pơkâ ƀă ‘no liăn cheăng pơkuâ, tơrŭm ƀă mâu khu ki ‘no liăn, khu râ, kơvâ cheăng, kong pơlê tơkŭm tŏng kum mâu tơdroăng xơpá tung tơbleăng mâu tơdroăng ‘mâi mơnhông cheăng kâ rêh ối pơlê pơla ƀă 3 tơdroăng pơkâ dêi tơnêi têa.

Hbrâ ăm mâu tơdroăng ki xiâm tí tăng ‘nâi plĕng ăm Vi ƀan hnê ngăn kong pơlê vâ tơkŭm po rôh hôp mơnhên tối tŏng kum mâu tơdroăng tơvâ tơvân hdrối hâi lơ 20/9/2023”.