Mơđah tơbleăng um kơchuâ dêi ngế kơchuâ Xu Man – Ngế kơchuâ mơngế Bơhnéa a Tíu ‘măn rak kế tơmeăm kong pơlê Gia Lai dế tơ’mot hên mâu kuăn pơlê tơmối lăm troh ngăn.

Mơđah tơbleăng kố ai 70 kơtâ um kơchuâ, um, bảng trích, kế tơmeăm, châ klâ bro 3 tơdroăng: Tơdroăng reh ối ƀă tơdroăng cheăng dêi Xu-Man, mâu tơdroăng ki tơkŭm mâu um kơchuâ dêi Xu – Man a tíu ‘măn tơmeăm kong pơlê Gia Lai ƀă ‘na um kơchuâ dêi Xu-Man a Tíu ‘măn kế tơmeăm Mỹ thuật Việt Nam.

Ing mê, vêh mơhno tơdroăng rêh ối, tơdroăng cheăng ƀă túa ki kơchuâ chêh dêi ngế kơchuâ um Xu-Man. Mâu um mê pơrá châ ngế kơchuâ chêh tung pơla sap ing hơnăm 1975 troh hơnăm 2005, ki hên cho kơchuâ ƀă sơn dầu. Mâu tơdroăng ki xiâm mê cho um kơchuâ dêi Xu-Man vêh mơhno hiâm mơno pâ nhuô̆m dêi mơngế Tây Nguyên ƀă pôa Hồ Chí Minh ing mâu um kơchuâ ‘na Pôa Hồ pêi cheăng, Pôa Hồ ƀă vâi krâ nhŏng o Tây Nguyên; Hiâm mơno pâ nhuô̆m tơnêi têa dêi kuăn pơlê Tây Nguyên châ mơhno ing mâu um kơchuâ ki lĕm, tơdroăng mơhno túa lĕm tro ‘na Mơdĭng lôi tơnâp kiâ - Pơ thi, ngê̆ thuât tŏn chêng koăng ƀă tơdroăng rêh ối cheăng kâ rêm hâi môi tiah pêi báu, tĕn pong.