Kơchơ cheăm Ia Hla, tơring Čư̆ Pưh, kong pơlê Gia Lai châ pro ing hơnăm 2020 bă pơxiâm ăm tê ing hơnăm 2021, ƀă ƀăng tơnêi pro cho 430 met karê. Kơchơ kố châ kơchuâ pro krá kâk ƀă ai tŭm on tơhrik, têa, kế ki hbrâ mơdât on chếo ƀă hên ki ê. Kơchơ ai 40 kơbong tơmeăm tung hngêi tơdrong ƀă 24 kơbong tê tơmeăm ki ối drêh, ối rêh ai lêm kuâ. Klêi 4 hơnăm pro klêi la ki hên ôh tá xúa, hên tíu ki hiăng tơ’nhiê, nhâ hŭn rơtoh drêh ngiât.

Hlo tơdroăng ki kơchơ chúa lôi tê kơtê la mâu tíu ki ai pái hơlâ troăng, pŭn hơlâ troăng hlo tê mơdró hên hĭn, ôh tá tơniăn ‘na troăng prôk, Vi ƀan hnê ngăn cheăm Ia Hla hiăng mơjiâng mâu tôh hnê tối, mơhnhôk khu mơdró kâ rơtế ƀă mâu tôh ki tí tăng ‘nâi plĕng, pơkâ tơleăng mâu ngế ki pro xôi liăn ngân ƀă tơdroăng ki hdi xo kĭng troăng vâ tê mơdró tơmeăm.