VOV4.Xơ Đăng - Tung pơla achê kố, kong pơlê Gia Lai hmâ ai tơdroăng xía vâ ‘na klâk têa, mâu ngế ki klâk têa mê ki hên cho a vâi hdrêng dế ối tung hơnăm hriâm. Tơdroăng kố pơkâ thế kơ koan ki ai tơdjâk, pơlê pơla ƀă rơpŏng hngêi kal tơmâng ngăn tâ nếo tung tơdroăng rak vế ƀă rak ngăn vâi hdrêng, malối cho tung pơla rơnó pơtê hriâm.

Tung rơpŏng hngêi kŭn a thôn 2, cheăm Trà Đa, pơlê kong kơdrâm Plei Ku, nâ Nguyễn Thị Thanh Hương ối khéa hơ’nêng a víu hngêi mâ ngăn um dêi kuăn kơnốu hiăng hlâ xua klâk têa a thôn Tây Hồ, cheăm Bàu Cạn, tơring Čư Prông a hâi lơ 14/6 kô nah. Nâ Hương tối, tơdroăng khéa hơ’nêng mê trâm xua rơpŏng hngêi ôh tá ai liăn vâ ăm dêi kuăn hriâm klê têa ƀă vâ ăm gá hriâm xêh tơdroăng ‘na hbrâ rơnáu drêng hum a têa tro klâk têa.

“Pơla hdrối kố nah rơpŏng hngêi á môi ngế kuăn, á ăm gá lăm pôu xah hêi ƀă dêi jâ pôa peăng á, rơtế xah mê ai kuăn muăn xăng há, péa ngế xuân hmâ xah  ƀă dêi rơpó. Hâi lơ 14/6 pơla hdrối kố nah lăm kơtú ƀa long la plông kơtú ƀa long mê ôh tá ai,  péa ngế prế brôk dêi rơpó lăm a long têa vâ xah têa, la ôh tá mơhúa tro hliâk chêng klêh a long têa, long têa mê trâu 7 met mê prế ôh tá chiâng vâ to.

Rơpŏng hngêi ôh tá ai liăn hlối ôh tá ai chôu, lăm a chiâk rêm hâi sap kơxo troh kong xêi măng nếo châi troh a hngêi, xuân ôh tá ai chôu djâ ăm muăn lăm a kŏng viên vâ pơtâp klê têa, bú xah ối rơtâ tá a hngêi tê”.

Klâk têa dế cho tơdroăng ki xiâm má môi ki pro hlâ mơngế a vâi hdrêng ƀă a mâu vâi o ki phô̆m vâ xông kân a kong pơlê Gia Lai, pro chiâng châi heăng,  khéa kho ăm hên rơpŏng hngêi. Xua mê, tơdroăng mơnhông mơdêk pơtâp môn klê têa ƀă hbrâ ăm vâi o hriâm tơdroăng hbrâ mơdât klâk têa ăm vâi hdrêng ƀă kuăn pơlê cho tơdroăng ki kal khât, kal rêm râ kơvâ cheăng rơpŏng hngêi ƀă têi tâng pơlê pơla tơmâng khât.

Sap apoăng khế 6/2022, khu ngăn mơhno túa lĕm tro - Ivá ƀă Ôm hyô kong pơlê Gia Lai tơrŭm ƀă mâu tíu pêi cheăng tơdjâk troh tơkŭm po Leh pơxiâm po tơ’noăng Olympic vâi hdrêng ƀă mơhnhôk tâi tâng kuăn pơlê hriâm môn klê têa, hbrâ mơdât klâk têa. Mâu vâi o hok tro châ hriâm mâu tơdroăng pêi pro tơdrêng tâng lơ oh tá mơhúa tro klâk têa; mâu tơdroăng pơlât tơdrêng, drêng tro rong râ; hnê tah tro khôa kế tung krôk, hnê pro pơlât drêng tro hơ-ou kế kâ ƀă hên ki ê.

O Bạch Thị Mai Uyên, hok tro lâm 8, Hngêi trung râ má péa Nguyễn Du, pơlê kong kơdrâm Plei Ku, tối: Mâu tơdroăng pêi pro a rơnó pơtê hriâm hơnăm kố ai pơxúa. Tung mê, klê têa cho môn  mâu vâi o mơ-eăm hriâm pơtâp klê têa vâ chiâng klê:

“A châ thái kố mâu vâi miê vâi tăm hnê pơtâp pêi pro mâu tơdroăng drêng trâm xía vâ ‘na hbrâ mơdât klâk têa, ing mê á xuân hlê iâ há, vâ hlê ăm tơná, drêng trâm tơdroăng ki tiah mê tung rêh ối, mê á hiăng ‘nâi vâ hbrâ ví vâ kum pơlât tơdrêng ăm mâu ngế xuân môi tiah tơná a. Ing rơnó pơtê hriâm kố a kô rah xo môn klê têa cho môn vâ pơtâp ivá, mơdêk ivá mo lĕm. Á vâ tối ăm rêm ngế thế hriâm môn klê têa vâ mơdêk ivá mo lĕm ăm tơná hlối hbrâ mơdât klâk têa tâng lơ trâm mâu tơdroăng xía vâ’’.

Hên hngêi trung hriâm a Gia Lai hiăng tơkŭm po hnê klê têa ăm hok tro

Pôa Trần Ngọc Nhung - Ngế pơkuâ ngăn ‘na Mơhno túa lĕm tro, Ivá ƀă Ôm hyô kong pơlê Gia Lai ăm ‘nâi, kong pơlê dế pơkâ mơdêk tơdroăng mơhnhôk tâi tâng kuăn pơlê hriâm klê têa, hbrâ mơdât klâk têa. Pơkâ thế troh hơnăm 2025, kô ai 50% ngế vâi hdrêng pá xôp 6 hơnăm troh 16 hơnăm thế chiâng klê têa.

“Tơdroăng mơhnhôk pơtâp klê têa ăm tâi tâng kuăn pơlê, malối ƀă vâi hdrêng cho môi tơdroăng kal pêi pro tơdrêng. Tơdroăng klâk têa a vâi hdrêng pơla hdrối kố nah tung lâp tơnêi têa ƀă a kong pơlê Gia Lai hên ‘nâng. Tâi tâng kuăn pơlê, mâu khu tơrŭm cheăng kal kí pơlê pơla, mâu tơring cheăm thế mơdêk hlê plĕng, thế ai hnoăng pêi pro dêi tơná ƀă tơdroăng pơtâp klê têa ăm mâu vâi hdrêng, vâi o phô̆m xông kân ƀă tâi tâng kuăn pơlê kơdroh iâ má môi todroăng klâk têa dêi kuăn pơlê xuân môi tiah vâi hdrêng”.

Sap apoăng hơnăm troh nôkố, lâp tung kong pơlê Gia Lai  hiăng ai 17 rôh  klâk têa pro 23 ngế vâi hdrêng hlâ. Malối ing rôh pơtê hriâm troh nôkố hiăng pơtối ai 5 rôh klâk têa pro 7 ngế vâi hdrêng hlâ. Ki hên mâu ngế hlâ mê xua vâi hdrêng ôh tá ‘nâi hlê hbrâ mơdât klâk têa ƀă vâi lăm tăng xêh tíu ai têa vâ xah hum a mâu têa kroăng têa plông,  mâu long têa vâ xah hên la ôh tá a mâu ki kân ngăn.

Vâ hbrâ mơdât xía vâ klâk têa a vâi hdrêng pro pơxúa tơ-brê kal ai tơchoâm tâi tâng pơlê pơla, rêm rơpŏng hngêi kal tơmâng tâ nếo tung tơdroăng kring vế rak ngăn vâi hdrêng, malối cho a rơnó pơtê hriâm vâ ví xía vâ rong râ a vâi hdrêng, malối ví tro klâk têa.

Pôa Võ Như Minh Quang, Ngế xiâm pơkuâ Ƀơrô Kring vế - rak ngăn vâi hdrêng ƀă Ôh tá pơrah pơla kơdrâi kơnốu - Khu xiâm ngăn cheăng pêi mô đô̆i tro rong ƀă rêh ối pơlê pơla kong pơlê Gia Lai ăm ‘nâi:

“Cho khât ‘nâng tơdroăng hnê tơdroăng erêh, tơdroăng vâ hlê ‘na phần mềm ăm vâi hdrêng xuân ối trâm hên xơpá, tơdroăng djâ môn hnê klê têa tung hngêi trung xuân hâi châ tơbleăng ƀă pêi pro hâi tơƀrê mê nôkố tơdroăng klâk têa xuân u-ối ai.

Thế mơ-eăm pro ti lâi vâ djâ tơdroăng hnê mơhnhôk troh ăm rơpŏng hngêi, vâ rêm ngế hlê plĕng hbrâ mơdât xía vâ rong râ ƀă klâk têa a vâi hdrêng. Mâu tơmeăm tôh têa, long têa, têa kroăng, têa krông, têa plông ki trâu tơ’lêi hlâu klâk têa thế chêh tơbleăng tối ăm ‘nâi a tíu ki mê ôh tá chiâng xah, tá chiâng hum vâ vâi hdrêng hlối xah hlối hriâm túa klê têa vâ kring vế ăm tơná’’.

Ƀă tơdroăng mơ-eăm dêi kơvâ cheăng, hlối mơdêk hnê tối, hlối mơdêk hnê klê têa, kô veăng kum hbrâ mơdât klâk têa ăm vâi hdrêng. Pakĭng mê, kal ai tơmâng khât, rak ngăn krâu khât ing nôu pâ, vâ ví vâi hdrêng tro klâk têa.

Hoàng Qui chêh

Gương tơplôu tơbleăng