Sap hơnăm 2021 troh nôkố, kong pơlê hiăng kơdroh 2 kơ koan xiâm, 23 kơƀong cheăng ối tung khu cheăng, 20 kơbong ối tung kơ koan xiâm, ƀă 2 kơbong cheăng dêi khu cheăng tơnêi têa ki ê; kêi đeăng kĭ mâu tíu pêi cheăng ăm tâi tâng mâu khu, kơvâ cheăng; Mơjiâng tơdroăng tơkêa bro tơ’mot chiâng môi Khu pơkuâ tơdroăng tơpui kâ ƀă kong têa ê Ƀơrô Vi ƀan kong pơlê, tơbleăng râ ai hnoăng kĭ. Tung hneăng hơnăm 2022 – 2024, kong pơlê hiăng kơdroh ƀiên chê̆ 351 ngế, gum rak tơniăn tro khu kăn ƀô̆, kŏng chưk.

Tơdrêng amê, Khu pêi cheăng Đảng Vi ƀan kong pơlê hiăng hnê mơhno séa ngăn, tơbleăng râ ai hnoăng vâ pro lế lĕm tro khu pêi cheăng tơnêi têa, tơmot chiâng môi, pro chiâng môi khu, kơvâ tiô troăng pêi dêi Chin phuh. Tung la ngiâ, kong pơlê Gia Lai tối hdrối kơdroh tơ’nôm 6 khu, kơvâ; 21 kơbong ối tung khu ƀă 30 kơbong ối tung kơ koan xiâm; pro lế lĕm tro tíu pêi cheăng tơnêi têa u ối 104 tíu cheăng.