Tiô tối a hneăng hôp, hơnăm 2023 ai hên tơdroăng xơpá, la kong pơlê hiăng mơ-eăm pêi mâu tơdroăng cheăng kâ - rêh ối. Ing mê, tâi tâng kơxô̆ liăn ‘no tâi tâng tung rêh ối riân châ 42 rơpâu rơtal liăn, châ tiô pơkâ ƀă mơdêk, 9,28% tâng vâ pơchông ƀă hơnăm nah.

Mâu pơkâ ‘na ki pơxúa tung kơvâ pêi chiâk - pêt rak ngăn kong - păn ká; cheăng ƀă kơmăi kơmok, mơjiâng tơmeăm khoăng; tâi tâng tơmeăm tê ‘ngré ƀă hên tơdroăng pơkâ ki ê xuân châ ƀă luâ tâ tâng vâ pơchông ƀă tơdroăng pơkâ. Mơhé tiah mê, xuân ối 7 tơdroăng pơkâ xiâm ƀă 2 tơdroăng pơkâ pêi ôh tá ai tiô tơdroăng pơkâ.

Hneăng hôp hiăng tơpui hên vâ tối, mơnhên mâu tơdroăng ki xiâm  ƀă tối troăng rơhlâ vâ tơkâ luâ xơpá vâ pê klêi mâu tơdroăng cheăng tung hơnăm la ngiâ.