VOV4.Xơ Đăng - Hâi lơ 4/7, Khu kăn Đảng bộ kong pơlê Gia Lai hneăng 15 (hneăng 2020-2025) hiăng tơkŭm po Hneăng hôp roh má 8 (po rơdâ). Hneăng hôp hiăng mơdoh hâi chôu ƀă ăm veăng hnê tối ƀă 2 tơdroăng hlá mơ-éa chêh tơbleăng ‘na xăm kơtiê rĕng ƀă krá tơniăn ton tiô kơxô̆ rơpŏng tung hdroâng kuăn ngo pơla hơnăm 2017-2020 ƀă troăng rơhlâ pêi pro troh hơnăm 2025; Tơbleăng mơgêi 3 hơnăm pêi tiô pơkâ ‘na rak vế ƀă mơdêk pêt nhâ loăng pro pơkeăng tung kong pơlê Gia Lai troh hơnăm 2025, troăng rơhlâ pêi cheăng troh hơnăm 2030.

Luâ 5 hơnăm pêi tiô pơkâ 05-NQ/TU, tơdroăng xăm kơtiê tơchoâm ƀă xăm kơtiê tung hdroâng kuăn ngo hiăng châ mâu râ ủy, mâu kăn rêm râ dêi kong pơlê Gia Lai ngăn cho hnoăng cheăng pêi ki xiâm má môi tung troăng rơhlâ mơnhông cheăng kâ rêh ối kong pơlê. Kơxô̆ rơpŏng xăm kơtiê tung lâp kong pơlê kơdroh 12,59%, kơxô̆ rơpŏng kơtiê tung hdroâng kuăn ngo kơdroh 26,31% luât Pơkâ.

Kơpong pêt nhâ loăng pơkeăng a tơring Čư Sê, Gia Lai tăng cheăng pêi ăm hên ngế pêi cheăng akố

‘Na Tơdroăng pơkâ pơtối rak vế ƀă mơnhông pêt nhâ loăng pơkeăng tung kong pơlê Gia Lai troh hơnăm 2025, troăng rơhlâ pêi troh hơnăm 2030, kong pơlê hiăng hên hdroh pêi tơdroăng kal. Tung mê hên kong pơlê chôa ‘lâng mơjiâng mâu kơpong pêt nhâ loăng pơkeăng, pro pơxúa tơ-brê tung cheăng kâ. Mâu túa pêi apoăng hiăng ăm hlo ki tơ-brê ƀă po môi troăng prôk ki nếo veăng xut tah kơdroh kơklêa xăm kơtiê. Ing mê, troh hơnăm 2030, Gia Lai mơ-eăm mơnhông mơdêk tơnêi pêt nhâ loăng pro pơkeăng dêi kong pơlê châ dâng 20 rơpâu ha.

Gương tơplôu ƀă tơbleăng