Tiô tối a hneăng hôp, tung tơdế apoăng hneăng 2020-2025, cheăng kâ - rêh ối dêi kong pơlê ối trâm hên xơpá. Laga, tâi tâng tơmeăm pêi lo tung kong pơlê xuân tâk 9,1% tâng vâ pơchông ƀă hơnăm 2020, luâ kơ’lo 8,6% ki hiăng pơkâ. Tê tơmeăm ăm kong têa ê dêi kong pơlê, malối tơmeăm pêi lo ing chiâk deăng hlo hên tơƀrê, hơnăm kơ’nâi hên tâ hơnăm hdrối, ƀă kơlo ki tâk riân 6,92% rêm hơnăm. Hneăng hôp xuân tối tơdrăng hvái ngăn  mâu tơdroăng ki ôh tá tro, ki xơpá, dêi mâu kăn ƀô̆, đảng viên.

Tơdroăng pơkâ dêi kong pơlê pơla hơnăm 2021-2030, hvái ngăn hơnăm 2050 ối hrá tâng vâ pơchông ƀă pơkâ.  A hneăng hôp, hên mâu kăn hiăng chêh, tí tăng ‘nâi mâu troăng rơhlâ vâ pêi klêi mâu pơkâ ki kong pơlê Đảng ƀộ hiăng pơkâ. Tiô pôa Nguyễn Anh Hùng- Ngế cheăng tung Khu pơkuâ hnê ngăn Đảng kong pơlê, Kăn hnê ngăn Đảng ủy, Ngế xiâm pơkuâ râng liăn kong pơlê Gia Lai, tung kơxô̆ hên troăng rơhlâ pơkâ pêi ăm tơdế hneăng kơ’nâi hơnăm 2020-2025, kong pơlê kal kơjo kum mâu khu mơdró, mơdêk pêi lo kế tơmeăm tê mơdró.